Эрдм седклд тааста болхла …

Моһа сарин 27-д театрин нарт-делкән өдр темдглгдв, тегәд хальмг артистнрин тускар цөн үг бичх седкл үүдв. Келн-улсин драматическ театрт билгтә олн артистнр үүлдҗәнә. Теднә негнь Канкан Делгр (зургт) мөн.

Баһ наснасн авн эн күүкн театрт седклән өгсмн. Дуринь суңһсн эрдмиг сән кевәр дасч авхар Делгр зергдән хойр ик сурһульд сурв. Хальмг студин баһчудла хамдан Щепкинә нертә училищ төгсәһәд, хөөннь ГИТИС-т мергҗлтән өөдлүлсмн. Басңга Баатрин нертә Келн-улсин театрин тәәз деер олн җилдән наадад, баһ биш дамшлт хоршаҗ авв. Олн зүсн дүрмүд бүрдәһәд, театрин һол нуувчнь юунд бәәдгинь эн медҗ авв.
Кесг нааднд орлцад, артистк дүр болһна өвәрцинь, талдан дүрмүдәс йилһрдгәр наадад үзүлҗ чадв. Эрдм седклд тааста болхла удан сурһулин болн дамшлтын ашт кесгнь дотраснь һарад бәәнә, гиҗ Делгр бийнь келнә.
Нег нааднд юм меддго баһ наста күүкнә дүр Делгр үзүлсмн. Дарук нааднд хар саната күүкд күүнә дүр тогтаһад, тас талдан бәәдләрн олн хәләһәчнрин оньг авлв. Шогта нааднд чигн Делгрин билг илдкҗ үзгднә. Йирин билг деернь эрдмин дамшлт немгдәд артистк Канкан Делгр даалһсн ямаран чигн дүриг әдл соньнар заң-авцинь медүлҗ наадҗ чадна.
Артисткин билгнь өвәрц гих кергтә. Делгр сәәхн дуулна. Көгҗмин нааднд артистк һол дүрмүдиг эвтә сәәнәр медүлҗ наадна. Тиим нааднд ирсн әмтн артисткин сәәхн ду соңсч ханхш. Наадна хөөн эдн кесгтән дууһинь тодлҗ, хоорндан күүнднә. Хамдан көдлҗәдг үүрмүднь Делгрин билгиг темдглнә, көдлмштән йир дигтә төләдән эрдмән ясрулхар шундгинь чигн үнлнә. Әмтнлә ээлтә төләдән Делгр олн үүрмүдтә, кергтә болсн цагт теднд дөңгән күргхәр адһна.
Басңга Баатрин «Булһн» нааднд Булһна дүриг Канкан Делгр наадсн билә. Баһ наста артистк эвлүн заңта күүкд күүг наач чаддган медүлсмн. Дүрин заң-авциг болн зовлңгиг әдлднь артистк наадна йовудт үзүлв. Тиигәд түрүн болҗ тогтасн дүрнь күцәмҗтә болад, үүдәгч хаалһинь сексн болдг.
Театрт көдлҗәдг җилмүдин йовудт Делгр олн зүсн дүрмүд тәәз деер үзүлв. Күүкд улсин әдл биш заңгинь эвтнь орулҗ драматургин, режиссерин шиидврлә ирлцүлҗ үзүлҗ чаддг төләдән артистк ямаран чигн нааднд орлцҗ чадна. Бичкдүдт нерәдсн нааднд чигн, драматическ ик нааднд чигн, көгҗмин, шогта нааднд чигн Делгр әдлдән билгән үзүлҗ наадна. Эрдмдән тохнята кевәр белдснә аш тернь болҗана. Классическ эс гиҗ өдгә цага наадн гиҗ йилһл уга альднь чигн артисткин билг күцц кевәр үзгднә.
Канкан Делгр бүрдәсн дүрмүд олн, эн дүрмүд артисткин билгин дөңгәр хәләһәчнрин оньг авлҗ йовна.
«Чудесная планета», «Чужой ребенок», «Первый учитель», «Хальмг хүрм», «Элстин вальс», «Эңкр манахс» болн нань чигн наадд талдан һазрин наадмд үзүлгдҗ, хальмг артистнрин билглә олн улсиг таньлдулна. Билгтә артисткин үүлдвр Хальмг Таңһчин Улсин Хуралын (Парламентин) Ханлтын бичгәр темдглгдсмн. «Белый лотос» гидг наадмд Канкан Делгр Әрәсән СТД-н Хальмг әңгин шишлң мөрә авч ончлгдсмн.
Үүдәгч үүлдврт зогслт уга, билгтә артистк урдк кевәрн театрин нааддт орлцҗ, седклнь туссн эрдмәрн уралан зүткҗ йовна. Олн хәләһәчнрин байрлсн чирә үзхләрн чик хаалһар йовхдан артистк иткнә.
ХӨӨЧИН Галина