Окн Теңгрин туск наадн

Келн-улсин драматическ театрт шин наадн хәләһәчнрин оньгт тусхагдхмн. Моһа сарин 30-д «Небесная защитница» гидг наадн үзүлгдв. Окн Теңгрин тускар нааднд келгдҗәнә. Билг-эрдмин олн зүсн янзар, хамгин түрүнд бииһин дөңгәр эн бурхн хальмг улсин җирһлд туслсн евәлтә үүлдврлә режиссер болн артистнр таньлдулв.
Кезәнәс авн келгдҗ йовдг домгт Догшн Маңһс теңгрин герл болдг нариг хулхалҗ авсна туск домг бәәнә. Бурхд үүдәсн нарн, сар болн одд күртл догшн эн эрлг хулхалсн болдг. Һазр деер өсч-боссн күүкн Окн тер маңһсла бәәр бәрлдҗ, теңгрин герл болдг тоотыг харсч авхар зөрглҗ һарна. Сәәхлә күүкнд кесг күчр-күнд тоотла харһх зовлң учрна. Бийән чаңһаһад дала юмиг дасч авх кергтә болв. Эн хаалһдан Окн олн үүрмүдтә болв. Тиигәд күүкн ямаран күнд шиидвр авч, хаалһд һарснь медгдҗәнә. Өөрхн элгн-садан үлдәһәд, цуг улсин амулң җирһлин төлә зөрглҗ үүлдсн Окн Теңгр хальмгудын әминь харсч авсн бурхн болҗ күндлгднә.
Окн Теңгрин тускар келҗ өгчәх наадыг режиссер Сергей Бурлаченко, бииһин халхиг Бурятин болн Туван ачта артист Менгелен Сат белдҗ.
Оюни чинртә наадыг белдсн баг үүлдврән эклхләрн Яшкулин хурлд одад, шишлң мөргүлд орсмн. Окн Теңгр Яшкулин хурлын сәкүсн гиҗ күндлгднә. Хурлын ах багш Мәәдр ламин әдс авад, наадан белдҗ тәвсмн.
УШКАНА Сувсн