Зуульчнриг тосхар белдҗәнә

Таңһчд зуульчллһн делгрлт авчах кемд мана һазрин ке-сәәхн тоотыг үзүлҗ, тууҗин болн сойлын тускар келҗ өгх улс кергтә болҗахнь медгдҗәнә. Таңһчин Төв хурлд болсн шүүврин хөөн һучн долан экскурсовод итклин цаас авад, белн бәәхән медүлв.
Тиим зөв авхар шүүвр өгсн улс дунд дамшлтта чигн әмтн, тер мет эн кергәр экләд соньмсчах әмтн чигн бәәнә. Бурхн Багшин Алтн сүмин тускар, терүг эргүлҗәх 17 Пандитын бумбсин тускар, Цаһан Аавин тускар тедн келҗ өгцхәв. Хурлыг кеерүлҗәдг зургудын тускар чигн, бурхн-шаҗна тускар ирсн улс сурвр өгсн цагт эдн тодрха цәәлһвр өгхмн.
«Тана керг-үүлдвр йир кергтә болн туста. Нааран ирдг әмтнд тадн хурлын тускар соньнар келҗ өгәд, әмтн бурхн-шаҗар соньмсхд туслнат. Хальмгт шаҗн яһҗ делгрлт авсинь, өдгә цагт хурл яһҗ үүлддгин тускар тадн чик цәәлһвр өгч чаддгарн цааранднь чигн туста үүлдвр күцәхит. Тегәд тана керг ик дааврта. Медрлән тасрхан уга өөдлүлхд таднд дөң болхвидн, – гиҗ хурлын гелң Анҗа шүүвр төгсснә хөөн келсн үгдән темдглв.
Зуульчллһна цаг эклхлә, экскурсоводмудын көдлмш икдхмн. Дәкәд болхла, Элстд шаҗна чуулһн болхла чигн гиичнрт цәәлһвр өгх улсин дааврнь нег үлү икдхин тускар Төв хурлын музейин көдләч Галина Айдарова келв. Бурхн Багшин сүмд ирдг улсин то икдх, цуг теднд тодрха болн соньн цәәлһвр өгхдән хурлын көдләчнр белдҗәнә.

УШКАНА Сувсн