Үнтә белг шүүҗ авв

Вчера, 16:20 | Общество, Таңһчин зәңгс, Зіњг

Җил болһн «Хальмг үнн» газет бичүлҗ авсн умшачнр дунд урмдулгч лотерей болна. Урднь зәңглсәр, моһа сарин 27-д дарани лотерей болв. Терүнә йовудт найн белг шүүгдв. Эн җил темдглгдх Алдр Диилврин 80 җилин өөнлә ирлцүләд, тедү то белг батлгдсн болдг.
Темдглхд, бичгдлһнә ашар Лаганя района элчнр түрүн зергләнд йовна, тер мет Хар Һазра, Целинн, Яшалтан райодын умшачнр бас нүүрләчнрин тоод орв.
Һоллгч белгнь болхла сән һара киитрүләч болв. Үнтә белг шүүҗ авсн Хар Һазра района Нарн Худг селәнә дунд сурһулин хальмг келнә багш Таһра Надежда мана редакцд шидр ирв. «Хальмг үннә» ах редактор Бембин Евгений иим үнтә белг шүүҗ авснлань йөрәһәд, мана газетиг дөңнҗәдг төләднь ханлтан өргв.
Темдглхәс, Надежда Сергеевна олн җилдән багшлад, «Хальмг үнниг» дөчн һар җилдән бичүлҗ авна. Энүнә келсәр, газетд барлгдсн соньн материалмудыг умшад, шинҗләд, көдлмштән даңгин олзлдг болв. Кезәңк җилмүдин газетин һарцсиг чигн эн әрүнәр хадһлна. Эн җил мана умшач ончта өөнән темдглхмн, тегәд шүүҗ авсн белг хойр дам байрта болв.
«Калмыкия» РИА-н һардач Марила Хоңһр үнтә белг шүүҗ авсн умшачиг бас йөрәҗ, цааранднь чигн төрскн келән, авг-бәрцән, сойлан дөңнҗ йовхинь дурдв.

КАРСАНА Евгения

Видео