Хальмгин эмчнр Мьянма орн-нутг орв

Вчера, 16:42 | Общество, Таңһчин зәңгс, Зіњг

Моһа сарин 28-д Мьянмад һазр чичрәд, зеткртә йовдлын ашт олн-әмтн әмнәсн хаһцв, кесгнь күнд шав авв. Мьянмад кесг тосхлтс нурад унв, тенд бачм бәәдл болн долан хонгтан келн-улсин һашудлһна өдрмүд зарлгдсн бәәнә. Хальмг Таңһчин Толһач Хаска Бату нег һазра улсин болн эврәннь нерн деерәс Мьянман улсин зовлңгинь хувалцҗ, шавтсн улст шулуһар эдгхиг дурдв. Шидр Бату Сергеевичин даалһврар дөрвн хальмг эмч зеткрин ашт шав авсн улст дөңгән күргхәр тиигәрән һарч йовв. Таңһчин бичкдүдин медицинск төвин ах эмч Дорҗин Александр, П.Жемчуевин нертә таңһчин эмнлһнә хирург болн травматолог эмчнр Болдра Олег, Цевгә Николай болн Цевгә Хоңһр эн багин ханьд орв.

Хол хаалһд һарч йовхиннь өмн эмчнр төв хурлд одад, Хальмгин Шаҗн Лам Гевш Тензин Чойдакла харһад, мөргүлд орв. Гевш Тензин Чойдак цуг хальмг улс ах-дүүнр болдг Мьянман улсин зовлң хувалцҗахиг медүлҗ, Бурхн Багшин шүтә белглв. Элстин аэропортд болсн харһлтд Хальмг Таңһчин Толһач Хаска Бату, таңһчин залврин Ахлачин негдгч дарукин үүл дааҗадг Цернә Эрднь болн таңһчин эрүл-менд харлһна министрин үүл дааҗадг Саран Булат эмчнрт цаһан хаалһ дурдҗ, эдн Мьянман улст дөңгән күргх седклән медүлснд ханлтан өргв.
- Мьянмад һазр чичрәд, кесг улс әмнәсн хаһцсна, шав авсна болн зәңг-зә уга геедрснә тускар соңсад, Әрәсән әм аврачнрин болн эмчнрин самолетмуд тер дарунь тиигәрән һарч йовв. Зеткртә йовдл учрв, тегәд бидн эрк биш дөңгән күргх зөвтәвидн. Бидн бурхн-шаҗнд шүтдг таңһч болнавидн, ода бидн ах-дүүнрин болн иньгллтин хәрлцә батрулҗанавидн, тегәд буйнч седклән медүлҗ, цуг халхин дөң-тусан күргх болҗанавидн. Тадн бат шиидвр авад, зөрмгән үзүләд, әмтнд дөңгән күргхдән белн бәәхән медүлснд ик ханлтан өргҗәнәв, – гиҗ Бату Сергеевич эмчнрт келв.
Таңһчин эрүл-менд харлһна министрин үүл дааҗадг Саран Булатын темдглсәр, Мьянман һардврин селвгәр эмчнрин багд ямаран мергҗлтнр орхиг шиидсмн. Аюлын медицинә орн-нутгин төвин мергҗлтнр давсн долан хонгас авн Мьянмад көдлҗәнә, эдн һазр чичрснә ашт шавтсн улст дөңгән күргҗәнә. Мана эмчнр Әрәсән мергҗлтнрин ханьд көдлхмн. Келхд, тиигәрән һарч йовх санаһан медүлсн улс баһ биш бәәсмн, болв бидн шавтсн, көл-һаран авсн улст дөң күргх мергҗлтнрин баг бүрдәхәр шиидвидн. Мана эмчнр шишлң госпитальд мөрн сарин 2-ас авн көдлхмн», – гиҗ Саран Булат темдглв.
Әрәсәд Мьянма Республикин элчин дарук зерг Кхант Ко Зан Хальмг Таңһчин улс күнд цагла эдниг дөңнснд ханлтан өргҗ, эмчнр шавтсн улсиг эмнҗ дарунь эдгхд эрк биш туслх гиҗ ицлән медүлв. Мьянман премьер-министр зерг Мин Аун Хлайн келсәр, бидн нег-негнәсн хол бәәдг бийнь өөрхн улс болнавидн.
- Мана таңһч ахнр-дүүнр болдг Мьянман улст дөң болх ик чинртә керг даалһв. Хальмгин Шаҗн Лам маднд ном умшад, цаһан хаалһ дурдв, тегәд бидн арһ-чидлән агсад, зеткрлә харһад шавтсн улст сән чинртә эмнлһ кехәр шунҗ көдлхвидн. Мана багд орсн эмчнр цуһар ик дамшлтта, өөдән мергҗлттә улс болна, – гиҗ таңһчин бичкдүдин медицинск төвин ах эмч Дорҗин Александр келв.
Болдра Олег болн Цевгә Хоңһр эдн Әрәсән болн Хальмгин элчнр болҗ ик даавриг үнн кевәр күцәхәр үгән өгв. Ахнр-дүүнрт мана дөң кергтә болҗана, тегәд бидн седклән тәвҗ, кергән өөдәнәр күцәхвидн. Бидн хамдан олн җилдән көдлҗәнәвидн, тегәд нег-негән дөңнҗ дамшлтан олзлҗ көдлхвидн гиҗ эмчнр хол хаалһдан һарч йовхин өмн таңһчин һардвриг иткүлв.
Урҗ өдр хальмг эмчнр Янгон балһснур нисч ирв, эдниг Әрәсән элчин нөкд Анастасия Соловьева болн нөкд Ситаго Саядо Йе Наин Лин тосв. Өцклдүр болхла мана эмчнр Сикайн балһсна бәәрн госпитальд көдлмшән эклв. Эдн Әрәсән эмчнрлә хамдан бәәрн улст дөң күргҗ, эмнлһнә болн месллһнә керг-үүлдврмүд күцәҗәнә.

ДООҖАН Наталья
ЗУРГТ: Хальмгин Шаҗн Лам Гевш Тензин Чойдак эмчнрлә харһсн кем

Видео