Теегән хадһлҗ, нәәрән давулв

Эн сарин эклцәр бамб цецгин наадм экләд, долан хонгин амрлһна өдрмүдт таңһчин райодт ирлцңгү керг-үүлдврмүд давҗана. Урҗ өдр Яшкулин район гиичнрән тосв.

Һаза зөвәр серүн болв чигн Яшкуль селәнә Диилврин талвңд олн-әмтн цуглрв. Яшкулин районд олн келн-улс хоорндан ниитәһәр бәәдг төләд «Созвучие единства» нәр-наадн бүрдәгдснь темдгтә болв. Иньгллтин бииһәр байрин концерт эклв.
Яшкулин района муниципальн бүрдәцин толһач Эдгән Бора нег һазра улсан бамб цецгин наадмла йөрәв.
– Кезәнә мана аавнр-ээҗнр дәәнә болн тууврин цагт ик зовлң үзсн бийнь цугинь дааҗ чадв. Хөөннь төрскн һазртан ирәд, таңһчан шинәс босхв. Мел эднә үлгүрәр эндр бидн төрскн һазр-усан делгрүллһнд тәвцән орулх зөвтәвидн. Хаврин нәр-наадан чигн сән кевәр давулҗ, цуһар эрүл-менд, байрта-бахта бәәтн, – гиҗ Бора Борисович темдглв.
Таңһчин Улсин Хуралд (Парламентд) Хальмгин Толһачин элч Манҗин Араш керг-үүлдврт орлцад, Хаска Батун даалһврар олн җилдән Яшкулин района толһачар көдләд, социальн-экономическ делгрлтд ик тәвцән орулсн Хаглыша Тельманд «Хальмг Таңһчин күндтә иргн» гидг нер зүүлһв (зургт). Тер мет Улсин Хуралын депутат Саңһҗин Лаг Парламентин Ахлач Артем Михайловин йөрәлин бичг умшҗ, олнд соңсулв. Терүнәс нань Яшкулин района «Искра» газет барас һарад, эн җил дигтә 60 җилин өөнән темдглҗәнә. Газетин редакцин седкүлчнр Улсин Хуралын Ахлачин Ханлтын бичгүдәр бас темдглгдснь бахмҗта болв.
Яшкулин района цергә комиссар Цеднә Константин СВО-д орлцачнриг даңгин дөңнәд, теднд нөкд болдг төләднь Берикә Басңгиг, Эрднь-Һәрән Батаг, Бадм-Һәрән Айсаг, Одган Валентинаг, Соятин Артуриг, Написат Мусаеваг ирлцңгү медальмүдәр ачлв.
Района ханьд орҗадг селәнә муниципальн бүрдәц болһн эврә ишкә герән босхад, терүнә дотркинь хальмгудын болн талдан келн-улсин авцар кеерүлҗ. Ишкә герт орҗ ирсн гиич болһниг бииһәр-дууһар тосад, улан зандн цәәһәр болн боорцгар тоов.
«Сказка», «Байр», «Цецг» коллективс, Яшкуль селәнә бүрдәцсин көдләчнр болн «Бамб цецг» шаңһа ансамблин артистнр байрин концертд орлцҗ, билг-эрдмәрн байрлулв.
Һартан өөтә района күүкд улс, тедн дунд Тамара Калабухова, Татьяна Стешенко, Увшан Лиана, Карсука Нүүдлә, Лиҗин Цаһан болн талдан эрдмчнр олн зүсн кегдлмүдән хулдв.
Тохма мал өскчәдг Яшкулин района нүүрлгч эдл-ахус селәнә эдл-ахун һәәхүл бүрдәв. «Улан Хөөч», «Кировский» болн «28-ч Әәрмин нертә» эдл-ахус хальмг болн грозненск тохма хөөдән һәәхүлд үзүлв. Бичкдүдин төлә болхла наадна талвң бүрдәгдв. Нег һазра арһлачнр бас энд эврәннь эд-тавран хулдад, энд-тендәс ирсн гиичнриг эврә эдл-уушар байрлулв.
Яшкулин района дегтрин саңгин көдләчнр тууҗин болн нег һазра нертә улсин тускар һәәхүл бүрдәсмн. Тер мет нәр-наадна йовудт района селәдин дунд хамгин шимтә хот белдлһнә туст шишлң марһанд Цаһан Усна, Хар Толһан болн Молодежненск һурвн СМО ончрв. Тәвн, һучн болн хөрн миңһәд арслңга сертификатмудар тедн ачлгдв.
Бамб цецгин наадмин йовудт спортын олн зүсн марһас давулгдв. Терүнд хамгин мергн, чаңһ-чиирг, чидлтә улс ончрсн болдг. Дииләчнр бас олн ачлврмудар темдглгдв. Бөк бәрлдәнә марһанд болхла Яшкулин района бәәтхә, Көтчнрә, Целинн, Лаганя, Хар Һазра, Ик Буурла райодын болн Элст балһсна элчнр бас орлцв.
Онц темдглхд, Яшкулин района һардвр «Теегән хадһлый» нертә лотерей зарлснь соньн болв. Оруһин мөңгәр Яшкуль селәнд сән кец-таал тогтагдхмн. Лотерейд әмтн үнтә белгүд шүүҗ авв.
Дарук долан хонгин амрлһна өдрмүдт бамб цецгин наадм талдан райодт давулгдхмн, терүнә тускар тодрхаһар дарани һарцстан зәңглхвидн.

КАРСАНА Евгения