«Ээҗин келн - эңкр зөөр»

Иим нертә марһан Элст балһснд болсмн. Марһана ашнь Бурхн Багшин Алтн сүмд диглгдв. Терүнд 80 һар бичкдүд орлцв. Хотл балһсна бичкдүдин 30 бүрдәцст сурһмҗ авчадг күүкд болн көвүд төрскн келән ямр кевәр меддгән үзүлв. Тавта-зурһата бичкдүдин медрлнь болн эрдмнь цуг халхасн үнлгдв.
Элст балһсна һардврин сурһуль-эрдмин заллт болн Хальмгин төв хурл эн марһаг бүрдәнә. Келн-улсин урн үгин зөөриг, шүлгүдиг сәәнәр меддгән бичкдүд үзүлв. Ахр нааднд орлцснь чигн зөвәр соньн болв.
Марһана ашлгч өдр хамгин сән белдвртә бичкдүдин билгнь йилһрв. Бичкдүд шаваш хайҗ, магтал келҗ, шүлгүд умшад, төрскн келндән дурта болдган медүлв. Бичкн орлцач болһниг цуглрсн әмтн байртаһар, альхан ташҗ тосчав.
Өсч йовдг үйнриг бичкнәснь авн төрскн келнә зөөрлә таньлдуллһна чинриг Хальмгин Шаҗн Лам таасч темдглв. «Билгтә эн бичкдүдиг үзәд, ик байрта бәәнәв, - гиҗ Гевш Тензин Чойдак келнә. – Бичкдүд төрскн келән, эврә сойлан, эврә авъясмудан медәд өсхлә ямаран сән болҗана. Эдниг сурһҗадг сурһмҗлачнрт, эк-эцкнрт эврә ханлтан медүлхәр бәәнәв. Тана көдлмш, өдр болһн өгчәдг сурһмҗ төрскн келән сәәнәр даслһнд эрк биш туста болхнь маһд уга».
Марһанд орлцач болһн Күндллһнә һашгар ачлгдв. Дииләчнрт болн мөрәлгч ормс эзлсн бичкдүдт Төв хурлын үнтә белгүд бәрүлҗ өггдв. Хальмгин Шаҗн Лам Гевш Тензин Чойдак бичкн билгтнриг йөрәһәд, ик күцәмҗ теднд дурдв (зургт). Төв хурлд болсн марһана ашиг диглсн концерт йоста хальмг келнә байр болҗ бичкдүдт тодлгдв.
УШКАНА Сувсн