Хамдан күцәмҗтәһәр көдлх күслтәһәр

Элст балһснд Әрәсән сурһуль-эрдмин көдләчнрин профсоюзин Хальмг Таңһчин бүрдәцин болн баахн багшнрин Хүүвин седвәрәр түрүн болҗ Өмн үзгин регионмудын баахн багшнрин ик хург болв. «Хамдан күцәмҗд күрий» гидг керг-үүлдврт Хальмг Таңһчин, Адыгейин, Краснодарск крайин, Аһшин, Ростовск болн Әәдрхнә мүҗсин болн ЛНР-ин Антрацитовск района баахн багшнр орлцв. Ик гиснь һурвн җилдән сурһуль-эрдмин халхар көдлҗәдг 70 күн баһчудын олна ниицән урмд өгч, эн эрдмәрн көдлхд дөң болдгин тускар күүндв.
Ик хургт Цугәрәсән сурһуль-эрдмин профсоюзин төв Хүүвин медлд үүлддг баахн багшнрин Хүүвин ахлач, Аһш балһсна Ворошиловск района 105-ч тойгта сурһулин багш, «2024 җилин Әрәсән багш» марһана дииләч Максим Сотников, Гегәрлтин ик сурһулин күцәмҗтә үүлдврин төвин һардачин дарук, багшнрин дамшач болн селвгч, «2015 җилин Әрәсән багш» марһана дииләч Мария Ахапкина орлцад, баахн багшнрла үүдәгч болн седвәртәһәр үүлдхин, билг-эрдмән делгрүлҗ күцәмҗтәһәр көдлхин туст сүв-селвг өгв. Кесг регионас ирсн баахн багшнрин төлә эрдмин кичәлмүд, лекцс болв, эдн хотл балһсна классическ гимназьд одв. Тер мет сурһуль-эрдмин көдләчнрин профсоюз баахн багшнрин зөв харслһна, күч-көлснә хәрлцәнә тускар күүндв. Квест-наадна йовудт багшнр эднә зөвин төрәр сурврмудт хәрү өгв, спортын дөрлдәнд орлцв. Келхд, һурвн өдртән болсн хургин медлд олн зүсн соньн болн сергмҗтә керг-үүлдврмүд болв. Багшнриг хальмг улсин сойлла, авъясмудла таньлдулад, төв хурлд, Келн-улсин театрт, нүүдлин музейд күргв.
Әрәсән сурһуль-эрдмин профсоюзин ЮФО-д үүлддг төв хүүвин сегләтр Владимир Гайворонский хургт орлцачнрт йөрәлин үг келәд, хальмгудас үлгүр авх кергтә гиҗ темдглв. «Ода сурһуль-эрдмин бүрдәцсин үүлдврт төрскнч сурһмҗ өглһн эркн чинр зүүҗәнә. Эн җил бидн Алдр Диилврин 80 җилин өөн темдглҗәнәвидн, мана орн-нутгт Төрскән харсачин җил болҗана, тегәд зуг багш сурһульчнрт төрскнч сурһмҗ өгч, келн-улсин авъяс, сойл, заңшал медүлҗ күргҗ чадҗана. Хальмгуд өвкнриннь тууҗ, авъяс, сойл әрүнәр хадһлҗ, олн келн-улс бәәдг Әрәсән ханьд зөвтә орман эзлҗәнә. Ода хальмгуд талдан келн-улсин элчнрлә зерглҗ, цергә шишлң керг-үүлдврт орлцҗ, зөрмгән үзүлҗ йовна», - гиҗ эн келв.
Хальмг Таңһчд түрүн болҗ ирсн Мария Ахапкина багшнриг болн сурһульчнриг урмдуллһна, күч-көлснә хаалһан эклҗәдг баһчудын билг-эрдм делгрүллһнә төрмүдәр дамшлтарн хувалцв. Келхд, Мария бичкнәсн авн театрар соньмсад, актрис болхар зуралҗала. Болв тууҗин багшар көдлдг экиннь селвгәр багшар көдләд, 2015 җилд Әрәсән багшнрин марһанд диилвр бәрсмн. Болв театрар бас соньмсад, бичкдүдин театрин режиссер болҗ көдлсмн. Дәкәд Марияг шар шаҗн соньмсулна, тегәд мана таңһчур ирснь энүнд ик байр үүдәв.
Аһш балһснас ирсн Максим Сотников бас багш болхар ухалҗасн уга, болв эн эрдмд седклән өгәд, бас орн-нутгин марһанд ончрад, күцәмҗтәһәр багшлҗана. Энүнә келсәр, сурһуль-эрдмин көдләчнрин профсоюз күч-көлснә хаалһан эклҗәдг баһчудыг дөңнҗ, ик урмд өгнә. Эн хургт Хальмг Таңһчд баахн багшнрт болн сурһмҗлачнрт, «Җилин багш» марһана призермүдт Хальмг Таңһчин Толһачин седвәрәр мөрән кемҗәг икдүлснә тускар соңсад, Аһшин мүҗд терүг бас олзлхин тускар ухалв.
Хальмг Таңһчин сурһуль-эрдмин болн номин көдләчнрин профсоюзин ахлач Цаһан Эдееван келсәр, эн ик хург түрүн болҗ мана таңһчд бүрдәгдсн бийнь күцәмҗтә болв. Баахн багшнр нег-негнләрн таньлдад, талдан регионмудын баахн багшнрин ниицәсин үүлдврәр соньмсв. Өмн үзгин регионмудын элчнрлә хамдан Луганск Улсин Республикин Антрацитовск района багшнр эн хургт орлцснь темдгтә болв. Келхд, Хальмг Таңһчин сурһуль-эрдмин болн номин көдләчнрин профсоюз Антрацитын багшнрла нөкцлтән батрулҗ үүлдҗәнә. Одахн Элстүр профсоюзн бүрдәцин 50 ахлач ирәд, мана дамшлтла таньлдсн билә.
ДООҖАН Наталья