Бамб цецгүд өврмҗ үүдәв

Мана таңһчд хаврин кемд давулгддг бамб цецгин наадм цаарандан давҗана. Мөрн сарин 19-д таңһчин кесг райодт бамб цецгин наадм болв. Сара хонгт давҗадг нәр-наадн Үстин района Цаһан Амнд күрч, керг-үүлдвр хальмг хувцта улсин йовлһнас эклв. Района болн селәнә бүрдәцсин көдләчнр терүнд орлцв. Керг-үүлдвриг Үстин района муниципальн бүрдәцин толһач Очра Геннадий секәд нег һазра улсан йөрәв.
Района селән болһна ишкә герт хальмгудын авг-бәрцлә болн сойлла таньлдҗ болв. Тиигәрән орҗ ирсн күн болһн улан зандн цәәһәр болн боорцгар тоогдв. Үстин района сойлын коллективс болн «Бамб цецг» ансамблин артистнр Иҗл һолын көвәд бәәдг улсиг болн гиичнриг билг-эрмәрн байрлулв. Бергин селәнә ишкә герин өөр темәд үзгдв. Әмтн өөрдәд зурган цокад бәәв.
Тер мет Баһ Дөрвдә район тер өдр гиичнрән бас тосв. «Цецгәрич, Баһ Дөрвдә һазрм» нертә нәр-наадн тенд бүрдәгдв. Хальмг Таңһчин залврин ахлачин дарук, то-дигин делгрлтин министр Этән Алексей төрскн һазртан ирәд, керг-үүлдврт орлцв.
– Сара хонгт давҗадг бамб цецгин наадмд ирдг зуульчнрин то җил ирвәс өсәд йовна. Төрскн райондан ирсндән байрта бәәнәв. Өөрхн элгн-садан, үүрмүдән үзәд, күүнә седкл байсна. Тер мет удл уга Алдр Диилврин 80 җилин өөнән темдглхмн. Эн җил Әрәсән Президент Владимир Путинә зәрлгәс иштә Төрскән харсачин җил гиҗ зарлгдв. Өдгә цагт цергә шишлң керг-үүлдврт орлцачнриг цуг халхарнь дөңнх кергтә. Мана өвкнрин болн эндрк баатрмудын туурмҗинь бидн мартх зөв угавидн. Бамб цецгин наадмин керг-үүлдврән сәнәр давулҗ, цуһар цаган сергмҗтәһәр давултн, – гиҗ Алексей Петрович нег һазра улсан йөрәв.
Бәәрн артистнр бүрдәсн концерт бас үзмҗтә болв. Тер мет Баһ Дөрвдә һазрт өсч-боссн, эндр таңһчиннь нер дуудулҗадг артистнр Орган Эрвена болн Ханьна Мингиян нәр-нааднд орлцснь нег һазра улст байр-бахмҗ үүдәв.
Приютна районд болсн бамб цецгин наадмд онц даалһвр күцәдг Хальмг Таңһчин Толһачин элч Анатолий Козачко ирҗ орлцв. Тенд бүрдәгдсн нәр-наадн бас сән йовудтаһар давсмн.
Хар Һазра районд болхла Комсомольский селәнә Ленинә нертә талвңд «Бамб цецгин частр» нертә керг-үүлдвр болв. Района селәдин ишкә гермүдәс босхгдсн хотн бас кеермҗтә болв. Тенд соньн кесг талвңгуд бүрдәгдв. Селәнә эдл-ахун күцәмҗин һәәхүл көдлв. Спортын халхар кесг марһанд бөкнр, харвачнр, җид хаячнр чидлән сөрв.
Бамб цецгин наадмд гиичнр олар ирҗәнә, таңһчин райодар зуульчлҗ кесг соньн тоотла таньлдҗана. Ик зунь хальмг у-өргн теегт һарч бамб цецгүдиг һәәхҗәнә.
КАРСАНА Евгения