Төрскән харсач

Мини өвк эцкин нерн Карага Нәәмн, 1924 җилд эн һарсмн. Долан класс төгсәһәд, арвн нәәмтәдән цергт мордла. Дигтә тер цагт дән экләд , Новочеркасск кавалерийск училищд сурчасн баахн салдсмудыг дәәнд йовулв. Күнд-күчр дәәнә хаалһар йовҗ Берлин балһснд эн күрв.
Мана ээҗ эврәннь тодлвран сергәһәд, иигҗ келнә: «Эцкм дала үг келдго билә, дәәнд ик зовлӊ үзәд, дәәнәс көлтә эрмдгтә болв, чикнь таӊхрад дүләрв. Йир уйдхларн, нульмснь асхрад, тагчг болж одна.
Зуг Диилврин туск зәңгиг Берлинд соңссан сәәнәр тодлна, яһҗ Эльба һол деер манахс болн һазадын орн-нутгин салдсмудта харһад, нег-негән теврҗ, үмсәд байрлцхала». Мини өвк эцк дәәнә чилгчәр полкд цаасд бичәд көдләд, 1946 җилд хәрҗ ирв.
Тер хоорнд Хальмг Таӊһчиг тараһад, хальмгудыг Сиврүр туусн бәәҗ. Сиврт эк-эцкән, элгн-садан әрә гиҗ олҗ авч. Өрчднь дала медальмүд гилвксн өндр, шар көвүн аавин үүдәр орад ирв. Аавнь өмнәснь: «Оо, аавин шар орад ирв!», – гиһәд теврәд байрлҗ, гиҗ мини көгшн наһц эгч тодлна.
Би өвк эцкән зуг зургудар, ээҗин келсәр меддв. Өвк эцкм төрскн һазртан ирәд, олн җилдән Артезианск МЖС-т көдллә. Эн төвкнүн заңта һольшг залу бәәҗ. Хамдан көдлдг үүрмүднь энүг тевчдмн. Бийнь шалтгта болад, дүлә улсин Цугәрәсән ниицәнә гешүн бәәсмн. Җил болһн Алдр Диилврин өдрлә Нәәмн Матвеевичиг ачлдг билә.
Мини өвк аавин нәәмн күүкднь өсәд-босад, эврә өркән өндәлһв. Ода эн арвн дөрвн ачта, хөрн хойр җичтә көгшә мөн.
Найн җил хооран диилвр делдсн мана өвкнр эн һашута цагт әмән әрвллго төрскн һазран харсад яһҗ әмд үлдсмб, гиҗ саннав… Миниһәр болхла, эдн цуһар баатрмуд мөн. Дорас өсчәдг баһчуд эднәс үлгүр авч, эднә тускар соӊсч,умшч йовх зөвтә.

ЛИҖИН Валерия