Тууҗлгч чинртә поезд ирв

Хөн сарин 2-т Алдр Диилврин 80 җилин өөн угтад болн Төрскән харсачин җиллә ирлцҗ, Элстин төмр хаалһин вокзалд «Санлын ниицлт. Туурмҗин күчн» нертә поезд ирҗ зогсв. Хальмг Таңһчин залврин ахлачин дарук, то-дигин делгрлтин министр Этән Алексей, Элст балһсна һардврин ахлачин дарук Довгопола Дмитрий, таңһчин баһчудын кергүдин агентствин һардачин үүл дааҗадг Камиль Маркеев, зөв-йос харлһна болн баһчудын бүрдәцсин элчнр, Б.Б.Городовиковин нертә Хальмг ик сурһулин цергә төвин баг болн Элстин бәәрн улс терүг тосв.

– Мана орн-нутгин һоллгч байрин өдр угтад, эн поезд Элстд ирснь йир темдгтә. Поездын вагонмудт үзүлсн хамг тоотыг дорас өсч йовдг баһчуд хәләҗ, өвкнрин туурмҗла өөрхн таньлдҗ чадв. Дәәнә цагт нег һазра хөрн һар күн залу-зөрмгәрн ончрҗ, Советин Союзин Баатрин нер зүүсн болдг. Зөргтә дәәчнрин санлынь тевчәд, үйәс үйд күргҗ хадһлх зөвтәвидн, – гиҗ Этән Алексей темдглв.
Поездыг һардҗ ирсн контр-адмирал Александр Гринкевич поездын вагонмудт бүрдәгдсн һәәхүлмүдин тускар цәәлһҗ келв. Мөрн сарин 19-д эн поезд Москваһас һарсн болдг. Элст балһсн арвн тавдгч зогсалнь болв. Далн тавн өдрин туршарт поезд орн-нутгин 75 балһс эргҗ, 33 миңһн һар дууна хаалһ темцхмн. Нәәмн вагонд болн шишлң дөрвн талвңд дәәнә цагин болн цергә шишлң керг-үүлдврин йовудт олзлҗадг техник үзҗ болхмн. Тер мет нег вагон Әрәсән цергә ик сурһульмудт нерәдгдв. Тернь дунд сурһулян төгсәҗәдг арвтнрин төлә туста болв. Вагон болһнд СВО-д орлцачнр бас экскурсь давулв.
Цергә шишлң керг-үүлдврин йовудт туурмҗарн ончрад, Әрәсән Баатрин нер зүүсн ах лейтенант, лектор болҗ ирсн Владислав Журавлевин келсәр, мана орн-нутгин әәрмин күчнь хамгин ик, терүнд церглҗәдг улс хамгин зөргтә болҗахинь олн-әмтн үзҗәнә. Өдгә цагт мана өмн тәвгдсн цергә даалһвр сән йовудтаһар күцәгдҗәнә. Поездын һәәхүлмүд хәләхәр ирсн бичкдүдиг үзхлә, эннь маднд чидл болн урмд өгнә. Мел эднә сәәхн иргчин төлә мана цергчнр дәәлдҗәнә гив.
Поездыг тослһна йовудт Әрәсән мөшклһнә комитетин Хальмг Таңһчин заллтын һардач Констанин Антохов Төрскән харсгч Алдр дәәнә ветеран Петр Леонтьевд Алдр Диилврин 80 җилин өөнин медаль бәрүлҗ өгв. Терүнәс нань Элстин 12-ч тойгта дунд сурһулин юнармин багд СВО-д орлцачин, сержант Мингиян Бикеевин нерн зүүлһгдҗәхнь зәңглгдв.
Керг-үүлдврин йовудт «Дәәч» төвин дамшачнр болн баһчудын бүрдәцсин нүүрләчнр Әрәсән харслтын Министерствин шишлң медальмүдәр ачлгдв.
Хальмгин Толһач Хаска Бату Элстд эн поезд ирлһнә туск ухан-тоолврарн бас хувалцв. Энүнә темдглсәр, поездыг таңһчин улс ик соньмслттаһар тосв. Нег үлү сурһульчнр чинртә һәәхүлмүд олар үзснь йир сән йовдл мөн. Тер юңгад гихлә өдгә цагт зәрмнь мана орн-нутгин тууҗиг хаҗһрар үзүлхәр седҗәнә. Керг-үүлдврт күндтә ветеран Петр Леонтьев орлцснь бас темдгтә болв. Бидн зөргтә дәәчнрин ачнр-зеенр, теднәс үлгүр авч, олна кергин төлә көдлхәр зүткҗәнәвидн гив.

КАРСАНА Евгения