Алдр Диилврин өөнд нерәдәд…

А.М.Амр-Санана нертә Келн-улсин дегтрин саңд тогтсн авъясар «Библио сө-2025» нертә Цугәрәсән керг-үүлдвр болв. Алдр Диилврин 80 җилин өөнд нерәдсн эн керг арвн дөрвдгч кемдән давулгдв.
Һоллгч керг-үүлдвр эклхәс урд дегтрин саңгин зәңгллһнә-сурһулин арвтнрин болн бичкдүдин төвин көдләчнр эврәннь соньн керг-үүлдвр давулв. Баһ наста умшачнрин төлә кесг талвң бүрдәгдв. «Цаһан тоһруд» гидг нәр-наадар байр эклв. «Бремен», «Новое поколение», «Бермудский треугольник», «Бойцовский клуб», «Голос времени» багмуд, Дана Бондарева болн талдан улс дәәнә цагин дуд дуулҗ, олнд соңсулв. Керг-үүлдврин йовудт «От героев былых времен», «Катюша», «Темная ночь», «Смуглянка» болн талдан дууна тууҗла эдн таньлдулв.
Тер мет баһ наста умшачнр Төрскән харсгч Алдр дәәнд нерәдсн кесг марһаст шунмһаһар орлцсинь темдглх кергтә.
Асхн зурһан часин алднд «Библиосө-2025» көтлврән цаарандан давулв. Дегтрин саңгин һардач Майя Безидеева «Эврә баатрмуд» гиҗ нерәдсн керг-үүлдвриг секч, олн умшачнран тосв. Таңһчин улсин билг-эрдмин Герин медлд үүлддг Хальмг Таңһчин күндтә иргн Галия Месхишвили һардҗадг ветеранмудын хор еңсг дууһар цуглрсн әмтиг байрлулв. Тер мет байрин концертд Росгвардин цергч Җанҗин Церн, «Созвездие», «Сар герл» багмудт орлцачнр, Куба орн-нутгас ирсн Б.Б.Городовиковин нертә Хальмг ик сурһульд сурчадг оютн Эсмеральда болн талдан баһ наста артистнр билг-эрдмән олнд нерәдв.
Дегтрин саңгин әңг болһн эврәннь соньн көтлврән белдҗ үзүлв. Дегтрин саңгин хойрдгч давхрт хурсн улс дәәнә цагин дуд дуулҗ, кеер чансн хаш амсв. Әрәсән бичәчнрин ниицәнә Хальмг әңгин ахлач Бадака Татьяна болн шүлгч Коксадан Виктор, «Солерос» баахн шүлгчнрин багин гешүд ирлцңгү төрәр эврәннь үүдәврмүдән умшв. Тер мет Чонкуша Петрин нертә Элстин билг-эрдмин болн Хахлына Тамаран нертә медицинск колледжмүдин оютнр, «Браво» театральн студьд орлцачнр бас дуд дуулад, нааддан үзүлв.
Төрскнч седклтә баһчудыг өскдг «Дәәч» цергә-спортын төвин дамшачнр өдгә цагин бу-селм, цергә шишлң кергсл, хувц үзүлв. Терүнәс нань түрүн дөң яһҗ күргдгин тускар бас келҗ өгв.
Келн-улсин әңгин көтлврт Приютна района Первомайский селәнә лицейин багшнр болн сурһульчнр орлцсинь заах кергтә. Тенд бас хальмг шүлгчнрин дәәнә цагин төрәр шүлгүд болн дуд соңсгдв. Гуманитарн номин умшлһна әңгд «Диилврин хаалһар йовад» наадыг «Калмыкия» хәәврин багмудын бүрдәцин һардач Халхинә Дмитрий давулв. Хойр девсңд болсн нааднд Төрскән харсгч Алдр дәәнә болн утх-зокъялын туск сурврмуд өгв. Зәңгллһнә-библиографическ әңгд болхла Тербатан Очр «Җаңһрин» кесг бөлгүдин тускар цәәлһҗ келәд, домбрт тасрхас дуулв. Әрәсән бичәчнрин ниицәнә гешүн, шүлгч, зурач Коксадан Виктор чолунд олн зүсн өңгтә ширәр зурлһна тускар келв. Тер мет хальмг төөмдә яһҗ боодгинь, георгиевск тасм олзлад өрч деерән өлгдг сәәхн тоот яһҗ кедгинь бас керг-үүлдврин йовудт цәәлһҗ келгдв.
Урднь мана орн-нутгин иргнмүд нарт-делкәд дегтрмүд хамгин олар умшдг боолҗ тоолгдҗасмн билә. Тегәд дорас өсч йовдг үйнр өдгә цагин некврлә ирлцҗәдг олн зүсн кергсл олзсн бийнь дегтр умшх зөвтә. Иим сана зүүҗ, үрдән өскх кергтә гиҗ керг-үүлдврин бүрдәһәчнр тоолҗана.
КАРСАНА Евгения