«Бамб цецг» ансамблин «Санлын хаалһс»

«Бидн - Әрәсә» ( «Мы Россия») гидг шаңһа көтлвр 2020 җилд эклҗ үүлдлә. Әрәсән Федерацин сойлын Министерствин седвәрәр үүдсн көтлвр үүдәгч коллективст йир сән дөң болҗана. «Бамб цецг» ансамбль эн төсвин кемҗәнд гастрольд һарч йовв.

Хальмгин дууна болн бииһин академическ эн коллектив Новочеркасск, Светлоград, Новоалександровск, Красногвардейск, Пролетарск, Ахтубинск болн Шахты балһсдын хәләһәчнрт билг-эрдмән үзүлхмн.
Хальмг улсин артист, ансамблин көгҗмин һардач Бадм-Һәрән Александр, Хальмг Таңһчин ачта артист, ансамблин балетмейстер Бамбрга Владимир гастролин йовудт үзүлгдх көтлврин тускар келҗ өгв. Алдр Диилврин 80 җилин өөнд нерәдәд белдсн көтлврт хамгин сән болн олна тааслт олсн ду-би, көгҗмин үүдәврмүд орв. Цуг орн-нутгин ик Диилврт хальмгудын орулсн тәвцинь билг-эрдмин дөңгәр үзүлхәр шунҗахан эдн медүлв.
Шаңһа эн көтлврин йовудт бидн тавн җилин туршарт Әрәсән кесг балһсдар, Татарстанд күрч концертсән үзүлвидн. Кавказин Республикүдт болн Иҗлин көвәһәр бәәдг балһсдар йовҗ, хальмг билг-эрдмлә таньлдулвидн, - гиҗ «Бамб цецг» ансамблин һардач Хальмг Таңһчин билг-эрдмин ачта үүлдәч Катан Савр ансамблин гастрольн хаалһсиг тодлна. - «Бидн – Әрәсә» («Мы Россия») гидг көтлвр ик орн-нутгин олн келн-улсин билг-эрдмлә таньлдулх арһ өгчәнә. Альднь болв чигн мана ду-бииг әмтн соньмсч хәләнә, артистнрин эрдмиг өөдәнәр үнлнә. Тернь маднд урмд өгнә».
Ансамблин коллектив белдсн көтлврән «Санлын хаалһар» гиҗ нерәдв. Бамбрга Владимирин келсәр, концертн көтлврт «1812 җилин дәәчнр», «Зәәсңгүдин би», «Алдр Җаңһртан нерәдлһн» гидг бииһин үүдәврмүд болн Алдр Диилврин өөнд нерәдсн олн дун орҗана.
«Бамб цецг» ансамблин алтн көрң болсн ду-бииһәс нань эн җил коллектив көгҗмин шин сюит белдв. «Берлинәс хәрҗ йовлав» гидг сюит дәәнә төрт нерәдҗ тәвсн бәәнәвидн, - гиҗ Бадм-Һәрән Александр келнә. - Эн сюит хәләһәчнрт таасгдх гиҗ иткҗәнәв».
Балһсн болһнд концертн бәәр әдл биш. Тегәд терүнәс иштә сольвр орулгдад, тогтсн бәәдллә ирлцүлҗ көтлвр хәләһәчнрт үзүлгдх. Эн йовлһнд 60 артист орлцҗана. Артистнрлә хамдан Элстин билг-эрдмин колледжин оютнр чигн эн көтлврт орлцҗана. Тиигәд көдлмшин йовудт ансамбль бийдән селгә белдлһнд килмҗ һарһҗана.
«Эн йовлһндан бидн театрализованн көтлвр белдвидн. Терүг күцәлһнд билгтә режиссер Сарңга Алексей дөң болв, - гиҗ Катан Савр келнә. – Төрскән харсгч дәәнд хальмгуд зөргтә кевәр дәәлдсинь үзүлхәр концерт белдгдв. Көтлвринь бүклднь үзүлдг селәдин болн бичкн балһсдын концертн талвңгуд ик биш. Болв альднь чигн мана артистнр хамгин сән ду-бииһән үзүлхмн».
Диилврин төлә хальмгуд ик-бичкн уга цугтан күчн-чидлән әрвллго үүлдсмн. Мана зөргтә дәәчнр фронт болһнд баатр үүлдврәрн нер һарсмн. Кесгнь Берлинд күрч, немш-фашистнриг уга кесмн. Эндрк эвин теңгр дор бәәдг үрднь болн ачнрнь өвкнриннь болн эцкнриннь зөргтә үүлдвриг күцц кевәр үзүлх седклтәһәр шунҗана.
Төрскән харсачнрин җилд болҗадг гастролин дарани хаалһин концертсән «Бамб цецг» ансамбль ах үйин санлд, Диилвр делдсн цуг улст нерәдҗәнә.

УШКАНА Сувсн