Баахн багшнрин марһан

Хальмг ик сурһульд баһ наста номтнриг болн багшнриг белдлһнә кергт ик оньган өгнә, эн туст кесг җилин туршарт шишлң көтлвр олзлгдҗана. Аштнь баһ наста номтнрин то цаг ирвәс өсәд йовна. Эдн аспирантуран төгсәһәд, олн зүсн төрәр диссертацан харсад, номтнр болад, соньн төрәр шинҗллтән кеҗ үүлдҗәнә.

Одахн Хальмг ик сурһулин кесг дацңгудт көдлдг баһчуд дунд «Багшин дебют-2025» гидг марһан болв. Энүнд баһ наста багшнр болн номтнр орлцв.
Эрдмчин керг-үүлдвр болн марһана нань чигн девсңгин хөөн жюри дииләчнриг болн призермүдиг йилһҗ авв. Әрәсән тууҗин, бәрмт цаасна болн архивн кергин тиңкмин ассистент Очра Баатр дииләчин өөдән нер зүүв. Экономикин болн салг-үүлдвриг заллһна тиңкмин ассистент Боован Данара хойрдгч ормд һарв, менеджментин тиңкмин ассистент Болдра Алексей һурвдгчнь болв.
– Цуг орлцачнриг, дииләчиг болн призермүдиг марһанд орлцҗ билг-эрдмән үзүлснләнь йөрәҗәнәв. Эдн эврә кергтән итклтәһән үзүлв. Эднд цугтаднь улм ик күцәмҗ болн хөв-кишг дурдҗанав, - гиҗ Хальмг ик сурһулин һардач Салан Бадм билгтә баһчудыг йөрәһәд, мана вуз йовудтаһар делгрҗәнә, мана багшнр болн номтнр сурһуль-эрдмин көтлвриг оңдарулҗ, шин эв-арһс олзлҗ көдлҗәнә, – гиҗ Бадм Катинович темдглв. Эн җил вузд баһ наста 18 багш ирв. Тиим кевәр ик сурһулин багшнрин ханьд билгтә мергҗлтнр немгдв, эдн баһчудыг дасхлһнд кесг шин тоот орулҗана.
- Марһан йир чинвртә болад бәәв, тегәд физикин, эсвин болн зәңгллһнә технологин баһ наста мана номтнр болн багшнр ашлгч девсңд орҗ чадсн уга. Тиим болв чигн билгтә баһчудын-номтнрин то мана ик сурһульд җил ирвәс өсч йовх йовдл намаг байрлулҗана. Теднә тоод ода доцентнр орв, эдн талдан баһчудт, оютнрт сән үлгүр үзүлҗ, теднд омг өгчәнә,- гиҗ дацңгин һардач Сумьяна Елена тоолврарн хувалцв.
Эднә дацңд билгтә баһчуд-номтнр баһ биш. Тер тоод ах багш Баталан Арслң ах эсвин онлын болн дамшуллһна төрәр оютнрт лекц умшҗ, семинармуд, кичәлмүд давулна. Тер мет зәңгллһнә тиңкмин ассистент Касан Мергн оютнриг олн зүсн төрәр дамшулна.
Нег үлү өдгә цагт эсвин болн физикин чинр өсәд йовна, яһад гихлә зуг эн кичәлин ул деер инженерин, программистин болн нань чигн эрдм дасч авад, таңһчдан болн орн-нутгтан туста үүлдвр күцәҗ болҗана. Тер даавран дацңгин баһчуд-номтнр сәәнәр меднә, аспирантурт сурч, диссертацан харсад, медрлән тасрхан угаһар гүүдүләд бәәнә. Цааранднь эдн оютнриг дасхад билгтә номтнрин шин селгә өскх гиҗ батар нәәлҗ болҗана. Баһ наста багшнрин марһан чигн туста керг болҗана гиҗ санхмн.

ТҮРВӘН Һуна