Һазр көдәрлһнә төрәр

Сегодня, 14:39 | Общество, Таңһчин зәңгс, Зіњг

РАН-а Хальмг номин Төвд Әрәсәд һазр көдәрлһнә төрәр өргн сүүр болв. Терүнд Әрәсән селәнә эдл-ахун Министерствин, ООН-а элчнр, номтнр болн талдан мергҗлтнр орлцв.
Эн долан хонгт «Торһн зам хаалһар болсн зуульчллһн-2026» төсв күцәлһнә йовудт тохма хөөдин болн ямадын Әрәсән һәәхүлд орлцхар олн гиичнр Элстд ирсн билә. ООН-а шиидврәр идгүдин һазрин нарт-делкән җил зарлгдсмн. Эннь олн орн-нутгудын төлә нәрн төр болҗана.
Әрәсән селәнә эдл-ахун Министерствин һазрин политикин департаментин һардач Вячеслав Леонов һол илдкл кев. Хаһлгдх төрмүдин тускар келҗ, ямр эв-арһс олзлҗ болхиг заав.
ООН-а элч Ксения Скэнлон Хальмг Таңһчд идгүдин һазрин көдәрлһнд онц оньг тусхагдҗахинь темдгләд, «Торһн зам хаалһар болсн зуульчллһн-2026» керг-үүлдврт орлцачнр иигәрән ирснь темдгтә болв, гиҗ келв.
Тодлхас, одахн Саудовская Аравия орн-нутгин Эр-Рияд хотл балһснд ирлцңгү ик хург давулгдсмн. Ода болхла ноха сард Моңһлын Улан Баатрт болх хургт цуһар белдҗәнә.
– Мана таңһчд мал асрҗадг төләдән идгүдин һазрин көдәрлһнә төрмүд даңгин бүрткгднә. Әрәсәд хамгин олар мал асрҗахнь мана таңһч болна. Тегәд эн төрмүд таңһчин экономиклә батар залһлдата, – гиҗ Хальмгин селәнә эдл-ахун министр Гаван Тимур келв.
Харһлтын йовудт олн төрмүд босхгдсн деерән сүүрт орлцачнр мана таңһчин сойлын байн зөөриг өөдәнәр үнлснь бахмҗта болв.
БАДМИН Занда

Видео