Дала Ламин Гегән ут наста болтха!

Така сарин 6 -д Дала Ламин Гегәнә нарта орчлңла мендлсн өдриг делкәд саяд әмтн темдглнә. Эн җил мана Ик Багш 90 җилин өөнән темдглҗәнә. Авалокитешвара бурхна хүвлһн гиҗ бурхн-шаҗнд шүтдг әмтн XIV Дала Ламиг күндлнә. Ут нас зүүҗ, эрүл-менд йовҗ, Бурхн Багшин номин оюни герлиг маднд күргҗ йовтха, гиҗ әмтн зальврна. Мана Ик Багш өр-өвч седклин бурхна хүвлһн болҗадг төләднь иигәд эн җилиг XIV Дала Ламин Гегәнә өр-өвч үүлдврин җил гиҗ зарлсмн.
XIII Дала Лам кен энүнә хөөн өөдән цол зүүхин туск, терүг альд олҗ болхин туск зәрлгән үлдәсн болдг. Терүгәрнь хәәвр кеһәд, шишлң ламнр бүрткҗ шинҗләд, Төвдин нег хотнд бичкн көвүг олсн болдг. 1937 җилд Такцер селәнд ламнрин шишлң баг ирәд, хәләһәд, шинҗләд, шүүвр кеһәд, шаҗна цуг йосрхл күцәһәд, эн көвүн Дала Ламин дарани хүвлһн болҗахинь медҗ авсмн. Энүнә тускар «Мини нутг болн мини улс» гидг дегтртән XIV Дала Ламин Гегән бичсмн.
Төвдин литәр мөчн сарин 30-д Дала Ламин Гегәнә һарсн өдр ирлцнә. Тиигәд мөчн сарин 30-ас, така сарин 5-д болн 6-д Дала Ламин гегәнә өөнднь нерәдсн керг-үүлдврмүдт әмтн оларн орлцхмн.
Энткгин һазрт Дхарамсалан төвдин төв хурлд байрин тер керг-үүлдврмүд болҗана. Дала Ламин Гегәнә ут нас насллһнд нерәдсн тер мөргүлмүдиг телеүзләр хәләҗ болхмн. Мөчн сарин 30-д болсн Дала Ламин ут насна мөргүл Амдо бәәрнә әмтнә нерн деерәс кегдв. Така сарин 5-д болн 6-д болх мөргүлмүд Дала Ламин Гегәнд Төвдин цуг улсин нерн деерәс давулгдхмн. Така сарин 7-д өөнин байрин ик мөргүл кегдснә хөөн Дала Ламин йирн җилин өөнд нерәдсн керг-үүлдврмүд цуг делкәһәр болхмн.
Хальмгт Таңһчд болхла Дала Ламин Гегәнә 90 җилин өөнд нерәдҗ ик мөргүлмүд така сарин 2-т, 3-д болн 5-д болҗана. Мана Оюни Багшин өөнд нерәдсн ик мөргүл така сарин 6-д болхмн. Бурхн Багшин Алтн сүмин гелңгүд ут нас заядг Цаһан Дәрк бурхнд нерәдсн мөргүл кеһәд, Дала Ламин Гегән ут нас наслҗ, амулң-менд йовҗ, дәкәд чигн олн җил бурхн-шаҗна номин цәәлһвр өгч, номин хаалһар мадниг көтлҗ йовтха гиҗ бурхдас сурҗ зальврхмн.
Москвад «Тубден Шедублинг» хурлд байрин ик керг-үүлдвр бас болхмн. Така сарин 6-д әмтн хурлд ирәд, мана Ик Багшт нерәдсн мөргүлд орлцҗ, иргчин тускар цуһар зальврҗ чадҗана. Хальмг Таңһчин автономин 105 җилд болн XIV Дала Ламин Гегәнә 90 җилин өөнд нерәдсн байрин керг-үүлдврт шаҗна үүлдәчнр, сойлын көдләчнр, Бурхн Багшин номар һардвр кеҗ бәәдг олн-әмтн олар орлцхмн.
Оюни Ик Багшин, Дала Ламин Гегәнә 90 җилин өөн саяд улсин ик байр болҗ, өр-өвч үүлдврт делгрлт өгч, оюни герл тархаҗ йовна. Ом мани падме хум!
УШКАНА Сувсн