Бурхна тәрни евәлд

Баһ Дөрвд селәнд әмтнә оюни җирһлд ик чинр зүүсн керг-үүлдвр болв. Бурхн Багшин номд шүтдг әмтн өдр болһн «Ом мани пад ме хум» гиҗ зальврна. Шаҗнд сүзглдг әмтнә һол эн тәрниг ик үзгүдәр бичҗ, олна оньгт тусхав. Олн җилдән әмтнд церглх эн әрүн зальврлһта тәрниг байрин бәәдлд секлһнә үүлдвр Баһ Дөрвдт болв.

Баһд Дөрвд селәнә захд Элстин- Аһшин хоорндк хаалһин амнд тер әрүн тәрн углҗ тәвгдв. Бурхн-шаҗна үүлдәчнрин нарт-делкән ик хург Элстд болх йовдлд нерәдҗ кегдсн эн әрүн керг цуг улсин амулң-менд хаалһд туслхнь маһд уга.
Евәлтә эн керг-үүлдврт нерәдәд, шишлң ном умшгдв. Дарунь байрин концерт болв. Эн җил дунд сурһуль төгсәсн баһчуд Бурхн Багшин номд нерәдсн урн үгин үүдәвр белдҗ, байрт орлцсн әмтнд умшҗ өгв. Цә, боорцгар тоогдад, әмтн бурхн-шаҗндан зальврв.
Тиигәд таңһчин цуг әмтн чадсарн Хальмгт болх шаҗна үүлдәчнрин нарт-делкән ик хургт белдҗәнә.