Хойр әрүн белг хурлд орҗ ирв

Москвад бәәдг Алексей Солдатов Бурхн Багшин Алтн сүмд шаҗна шүтә белглв. Бурхн Багшин номар болн сойлар соньмсдг, шаҗна туск тоотыг цуглулдг эн күн Хальмгт дару-дарунь ирсн саамдан Бурхн Багшин Алтн сүмд даңгин ирҗ зальврна.

Дарани нег ирлһндән хурлд нерәдҗ, онц чинртә белгүд авч ирв. Алексей Солдатов Хальмгин Шаҗн Ламд Цаһан Дәркин болн Бурхн Багшин бурхдыг бәрүлҗ өгв. Хальмгин Шаҗн Лам гевш Тензин Чойдак үнн седклин ханлтан терүнд медүлв.
Алексей Солдатов олн җилин туршарт бурхн-шаҗнла залһлдата тоотар соньмсад, кесг шүтә болн бичкн бурхдыг цуглулна. Бурхн Багшин номд иткдг күн болҗанав, гиҗ Алексей Михайлович ухан-тоолвран медүлнә. Бурхн Багшин номиг эн күн арднь орҗ дасчахинь терүнлә кесн күүндвр иткүлнә.
Зургуд чигн эн күн зурна. Иргчдән зургудын һәәхүл бүрдәхин тускар Алексей Солдатов Хальмгин Шаҗн Ламла күүндв. Ода Солдатов бурхн-шаҗна нәәмн әрүн тоотын зург зурҗахан медүлв.
Гевш Тензин Чойдак Бурхн Багшин номд үнн седкләрн шүтҗәдг Алексей Михайловичд гүн ханлтан медүләд, үүдәгч үүлдвртнь күцәмҗ дурдв.