Бат өрк-бүлмүдин тускар

Бурхн Багшин номд өрк-бүлин чинрин тускар, шагшавдын болн нань чигн сурһмҗиг бичкдүд өрк-бүләсн авдгин тускар келгддгинь әмтн меднә. Өрк-бүлин өдр темдглгдсн цагла Росгвардьд церглҗәдг әмтн Бурхн Багшин Алтн сүмин гелң Сананла харһҗ, күүндвртнь орлцв. Хальмг Таңһчд үүлдҗәдг Әрәсән Росгвардин Заллтын һардврин седвәрәр эн харһлт бүрдәгдв.

Энүнә йовудт Санан гелң бурхн-шаҗна номин туск цәәлһвр өгәд, эн номд орсн шагшавдын сурһмҗин чинриг темдглв. Өрк-бүлин сурһмҗин чинрин тускар Санан гелң тохнята цәәлһвр өгв. Өр-өвч седклтә болдгиг, хаҗһр йовдл һарһлһнас гетлдг ном умшҗ болхин тускар келгдв. Бәәдл-җирһлдән оюни тер зааврмудар һардвр кеҗ бәәдг өрк-бүлмүдт му тоотас саглуллһна болн учрсн күнд тоотыг хамдан дааҗ һарлһна дамшлт бичкдүд болн баһчуд авдгинь Санан гелң заав.
Өрк-бүлд өгдг сурһмҗин чинрин тускар Бурхн Багшин номд ик чинр зүүлһгддгин тускар келәд, Санан гелң тиим өрк-бүлмүдт өссн баһчуд бат бүлин эзд болна гив. Эк-эцкнрән, ах үйин улсиг, өвкнрин авъясмудыг күндлҗ, сән сурһмҗ авна, гиҗ Санан гелң темдглв.
Бат өрк-бүлмүд орн-нутгин бат шивә болдгин туск соньн күүндвр Росгвардин көдләчнрт зөвәр соньн болв.