Күңкл Багшт – хальмг улсин йөрәл

Хальмг Таңһчин «Бамб цецг» дууна болн бииһин академическ ансамбль Дхарамсала балһснд Дала Ламин Гегәнә өөнд нерәдсн байрин концертд орлцв. Энткгин һазрт Дхарамсала төвдин бурхн-шаҗна оюни төв болҗана.

Таңһчиннь шар туган өргәд, хальмг биичнр «Чичрдг» бииһән Дала Ламин Гегәндән нерәдв. Теегин салькн мет хурлзсн түргн сәәхн хальмг би мана Оюни Багшт Хальмгин әмтнә мендиг күргв. Байрин нәәрт ирсн цуг улс шуугҗ, ниргҗ хальмг артистнрин эрдмиг таассан медүлв. Ут тууҗин цагас авн Оюни Ик Багштан мөргҗ зальврҗ йовх хальмгудын йөрәл дигтә һарсн өдрләнь така сарин 6-д Дала Ламин Гегәнд күрв. Хальмг Таңһчин билг-эрдмин ачта үүлдәч Катан Саврин һардврт «Бамб цецг» ансамблин биичнр тиигәд Күңкл Багшт ик байр үүдәв.
Энд Хальмгт болхла Ик Багштан нерәдсн мөргүлмүд кеһәд, байрин керг-үүлдврмүд болҗасн цагла генткн теңгрин бәәдл хүврәд, оһтрһу ду һарад, хур асхад орад, цуг тоот сергҗ дүрклсн болв. Тиигҗ йиртмҗ чигн әмтнә зальврлһиг дахад, Оюни Көтлврчд күндллһән медүлсн болҗ һарв. Тиим евәлтә кевәр Дала Ламин Гегәнә 90 җилин өөнин өдр цуг улст мартгдшгоһар тодлгдв.
УШКАНА Сувсн