Оңһцнь заһсар дүүртхә!

Сегодня, 13:59 | Общество, Таңһчин зәңгс, Зіњг

Җил болһн така сарин хойрдгч нарн өдрлә мана орн-нутгт заһсчин сән Өдр темдглнә. Эн өдрлә заһс аңнлһна халхар көдлдг улсиг йөрәнә. Сән Өдр угтҗ таңһчин селәнә эдл-ахун министерствин заһсна эдл-ахун үүлдврин ах мергҗлт Валерий Муджиков урдк җилин ашин болн эн җилин көдлмшин тускар келҗ өгв.
– 2024 җилин ашар Лаганя района заһсчнр зураһан 71,24 процентд күцәв, ут тоодан 2653,537 тонн заһсн бәрҗ авгдв. Келхәс, РПП-н ассоциац, арһлач М.А.Богатов, таңһчин арһлачнриг дөңнлһнә саң көдлмшән күцәмҗтәһәр давулв. Тер мет эн җилин хаврар Көк теңгсин ар үзгт заһс аңнлһнд зурһан бүрдәцин заһсчнр орлцв. Заһс аңнлһна хаврин кем лу сарин 15-д эклх зөвтә бәәсмн, зуг теңгрин бәәдлиг учртан авад, заһсчнр теңгст моһа сарин 10-д һарад мөрн сарин 30-д көдлмшән дуусв. Энүнә ашар 741,740 тонн теңгсин эдл-ууш аңнгдв. Тер тоод сазн, җаал, цуув, кет балг бәргдсн билә, – гиҗ Валерий Муджиков зәңглв.
Эндр сән авъяст тохрсар, Лагань балһснд заһсчин сән Өдрт нерәдсн керг-үүлдвр болхмн. Өрүн дөрвн часла шинкн нарн боссн кемлә заһсчнрин дунд марһан давулгдв. Терүнә дару болхла теңгст аюлла харһад, әмнәсн хаһцсн заһсчнрин санлынь тевчәд, заһсчин бумблвд гүрмр цецгүд тәвгдхмн. Цааранднь «Көк теңгсин айсмуд» нертә паркд олна нәр болхмн. Тенд ирлцңгү һәәхүл болн заһснФест марһан бүрдәгдх болв. Энүнә йовудт заһсна зүүтә зүсн-зүүл хот кеҗ гиичнриг тоохмн. Терүнәс нань байрин концерт болхмн, тенд Лаганя района сойлын коллективс билг-эрдмәрн байрлулхмн.
Давсн җилин ашар РПП-н ассоциац (һардачнь А.В.Мангутов) нүүрт һарв. Терүнәс нань заһс аңнлһна халхар олн җилдән көдлҗәдг улсиг таңһчин селәнә эдл-ахун министерствин Күндллһнә һашгар ачлхмн. Тедн дунд эн ассоциацин мергҗлт Цаһан-Манҗин Валерий, хамгин сән бүрдәһәч «Каспий» ООО-н һардач Акиф Аскер-Оглы Алиев заагдв. Лаганя района муниципальн бүрдәцин толһачин Күндллһнә һашгар болн Ханлтын бичгәр Николай Нюрюпов, Цернә Алексей, Сарңга Алексей, Валерий Гришин, Бадмин Виктория, Ниҗлән Баатр, Николай Чалаков, Тумуда Нелли ачлгдх болҗ һарв.
Әмтн көргәсн заһсиг олар таасад Элстд болн Лаганьд хулдгддг болв. Утсн болн хатасн заһсиг нег һазра улс бас таасна.
Арһлач Бадмин Виктория таңһчин болн района селәнә эдл-ахун яармст болн ирлцңгү керг-үүлдврмүдт даңгин орлцна. Эндр болхла заһсчин сән Өдрлә заһснФест керг-үүлдврин йовудт заһсна зүүтә шимтә хотар нег һазра улсан тоохмн. Темдглхәс, эн җил арһлач Хальмгин селәнә эдл-ахун министерствин халхар йилһсн демин мөңг авсн билә. Эн мөңгәр нәәмн шин оңһц хулдж авв.
Һундхас, җил ирвәс Көк теңгсин цувгин усн баһрад болн ар-барун үзгәс салькн үләхлә, оңһцс теңгст һарч чадхш. Тегәд ода Лаганя цувгин йоралыг гүүдүлх кергтә болҗана.
Одахн Лаганьд таңһчин селәнә эдл-ахун министр Гаван Тимур ирәд, заһсна эдл-ахун үүлдврин көдләчнрлә харһад, нәрн төрмүдәр күүндҗ дөң-тусан күргхән медүлв.
Заһсчин көдлмш зөвәр амр биш, теңгрин бәәдлиг эрк биш учртан авх кергтә болна. Эндр болхла заһсна эдл-ахун халхар үүлдҗәдг көдләчнриг сән Өдрләнь йөрәҗ, эрүл-менд, цаһан хаалһ болн ик күцәмҗ дурдҗанавидн.
КАРСАНА Евгения

Видео