Балһсна әмтнд сергмҗ үүдәһәд

Вчера, 12:42 | Общество, Таңһчин зәңгс, Зіњг

Элст балһсн 160 җилин байрин өөнд белдҗәнә, хотл балһсна микрорайодар болхла «Элстин асхд» гидг нәр кегдв. Балһсна әмтнә җирһлд батрсн нәр-наадн эн җил Элст балһсна 160 җилин өөнд болн Төрскән харсачин җилд нерәдгдлә.

Эңкр Элстдән нерәдсн байрин асхд хөн сарин 16-д эклсн билә. Балһсна җирһлд сән авъяс болҗ батрсн асхд хотлын негдгч микрорайонд эклв. 23-ч тойгта герин өөрк талвң деер микрорайона нәр болсн билә. Элст балһсна тууҗин туск дегтрмүдин болн һарин һарцсин һәәхүл әмтнә оньгт тусв. Нәәрт ирсн әмтн олн зүсн керг-үүлдврт орлцв.
Хөн сарин 23-д хотл балһсна өөнд нерәдсн байр 2, 6 болн 7-ч микрорайодын әмтнә төлә бүрдәгдв. Балһсна эн райодт бәәдг 4, 12, 24, 30 болн 31-ч бичкдүдин садмудын бичкдүдин белдсн һәәхүллә әмтн таньлдв. «Мини Әрәсә» гидг ду дуулҗ байрин асхнд ирсн әмтнд Николай Арсенов сергмҗ үүдәв. Эн микрорайодт бәәдг олн үртә бүлмүдт килмҗ һарһгдв. Эскляновихнә, Музраевихнә, Кажгалиевихнә, Дорджиевихнә, Шарбаевихнә бүлмүдт Элст балһсна һардврин болн Элст балһсна Хургин сертификатмуд бәрүлҗ өггдв.
Тедү мет Элстин 3, 4, 5 и 10 микрорайодын әмтн хотл балһсна өөнин байриг хөн сарин 30-д темдглв. Хотл балһсна өөниг угтҗ кегдҗәдг байрт ирсн әмтн сергмҗтә би биилҗ, нәәрән эклв.
Энд дегтрмүдин һәәхүллә әмтн таньлдв. Таңһчд һардг барин һарцс чигн эднә оньгт тусхагдв. 12-ч, 21-ч дунд сурһулин сурһульчнрин болн 18, 20 болн 22-ч тойгта бичкдүдин садмудын күүкд-көвүдин зурсн зургудын һәәхүлин өөр олн улс цуглрҗ, энд тәвгдсн тоотыг кесгтән һәәхв. «Хоша бәәдг хамгин сән күн» гидг мөрәһәр микрорайодын күндтә улс ачлгдв. Олн үртә өрк-бүлмүдт чигн зөвтә килмҗ тусхагдв.
Баировихн, Шибиджиевихн, Убушиевихн, Сарыловихн, Манджиевихн, Романовихн, Маштыковихн олна дунд темдгтә өрк-бүлмүд мөн. Ниитә эн өрк-бүлмүдт белгин сертификатмуд бәрүлҗ өггдв.
Хотл балһснаннь өөнд белдәд, өмн үзгин районд бәәдг әмтн сергмҗтә кевәр цаган давулв. Скрипкинә нертә уульнцд цуглрад, Элст балһсна әмтнә болн тууҗин тускар келҗәдг дегтрмүдлә таньлдв. Энд бүрдәгдсн керг Төрскән харсачин җилд нерәдгдв.
Байрин концертд Элст балһсна үүдәгч коллективс болн онц дуучнр орлцв. 30-ч тойгта бичкдүдин садын үзүлсн наадн ик сергмҗтә болв. Орс келн-улсин гимназин сурһульчнрин билг-эрдм чигн әмтнд байр үүдәв. «Союз СВОих» багиг цугтан альх ташҗ тосв, эднә дуулсн дун цуглрсн улст таасгдв.
Энд бәәдг олн үртә Бадмаевихнә болн Чернышевихнә бүлмүдт цуглрсн әмтн күндллһән медүлв.
Мөчн сарин 13-д Элст балһсна өмн-деед үзгин райодын әмтн «Элстин асхн» гидг байрт цуглрҗ ирв.
Элстин нәәрт орлцхар ирсн әмтн балһсна тускар ямаран дегтрмүд һарсинь дегтрин һәәхүлд үзв. Төрскән харсачнрт нерәдсн дегтрмүд эдниг соньмсулв. Эн районд бәәршҗәдг бичкдүдин садмудын күүкд-көвүдин болн 2-ч тойгта сурһулин сурһульчнрин кегдлмүд болн зургуд әмтнд таасгдв. «Олимп» эстрадн балет үзүлсн «Цаһалһн» гидг би зөвәр соньн болҗ медгдв. «Союз СВОих» дууна баг, «Байн Тег» гидг бииһин ансамбль болн нань чигн үүдәгч коллективс концерт үзүлв.
Элстин асхдын йовудт олн үртә өрк-бүлмүдиг күндлдг сәәхн авъяс тогтсн бәәнә. Энд бәәдг Тюрбеевихнә болн Лещенкон бүлмүдт Элст балһсна Хургин депутат Энян Андриан белгин сертификатмуд бәрүлҗ өгв. Эн нәәрт ирсн әмтн хальмг цә ууһад, боорцгар тоогдад, әвртә сәәнәр амрв.
Аршан селәнд эн байр бас сән кевәр давв. Нәәрт ирсн улсиг хальмг цәәһәр болн боорцгар тосч, йөрәлин үгмүд нерәдв. «Элст» гидг ду дууч Лилия Эрдниева-Джимбиева дуулҗ, хотл балһсна өөн өөрдҗ йовхинь тодлулв. «Союз СВОих» дууна баг болн үүдәгч нань чигн коллективс Аршана әмтнд билг-эрдмән нерәдв. Селәнә әмтнә урн һарар кегдсн кегдлмүдин һәәхүл олн улсин оньг авлв. Зунгруевихнә болн Мучкаевихнә олн үртә өрк-бүлмүдт сертификатмуд бәрүлҗ өггдв. «Алдр Диилврин найн җил» гидг медальмүд бәрүлҗ өгсн йовдл әмтнд тодлгдв.
Мөчн сарин 27-д «Элстин асхна» сәәхн нәәрт 8-ч болн 9-ч микрорайодын әмтн байсв. «Универсам» лавкин өөрк талвңд делгрсн нәр-нааднд әмтн ик дуртаһар орлцв.
Хальмгин хотл балһсн Элстин 160 җилин өөнд нерәдсн байрин асхд эн җил Төрскән харсачин җиллә ирлцҗ кегдҗәхнь чинртә болҗана. Зүркндән өөрхн Элстд нерәдсн байрин нәәрмүд хойр сара хонгин туршарт болв. «Элстин асхд» микрорайодын әмтнд сергмҗ үүдәҗ, хотл балһсндан дурта бәәхән медүлв.

ҖИРҺЛИН Кермн

Видео