Тосхлтсин йовудыг бүрткв

Давсн амрлһна өдрмүдт Хальмг Таңһчин Толһач Хаска Бату цусна төвд кегдҗәдг бат ясврин йовудыг бүрткҗ хәләв. Хальмг Таңһчин залврин Ахлачин дарук- таңһчин социальн делгрлтин, күч-көлснә болн көдлмшәр тетклһнә министр Өлзәтин Марина, таңһчин залврин Ахлачин дарук Александр Мишаков, таңһчин эрүл-менд харлһна министр Саран Булат бүрдәцд кегдҗәдг көдлмшин тускар тооцаһан өгв. Цусна төв 1981 җилд эдлврт орулгдсмн, тер цагас авн энд бат ясвр кегдәд уга билә. Ясврин көдлмш Хальмг Таңһчин социальн-экономическ делгрлтин көтлврин йовудт кегдҗәнә.
«МонтажКапСтрой» тосхлтын бүрдәцин һардач Олег Гусевин келсәр, бәәрин эрсмүд бат, тегәд эн дәкәд олн җилдән сәәнәр олзлгдхин төлә эдн улынь батрулв, ораһинь сольҗана. Ода деерән энд цуг көдлмшин өрәлнь кегдсн бәәнә, тегәд усар тетклһнә, канализацин, дулана сурвлҗн болн түүмрәс саглуллһна болн лифтин кергсл сольгдв. Һаха сар күртл тосхлтын орань болн һазак бәәдлнь бүклдән шинрүлгдхмн. Дарунь дотрк көдлмш кегдҗ, цуг кергтә кергсл углҗ тәвгдхмн. Ясврин көдлмш бар сард төгсх зөвтә, тегәд тосхачнр батлгдсн цаг-болзг күртл көдлмшән эрк биш төгсәх гиҗ эн темдглв.
Төвин ах эмч Уташа Санҗ таңһчин Толһач һурвн җил хооран цусан өгхәр ирсиг тодлад, энд бат ясвр келһнд дөң-тусан күргх болҗ үгән өгәд, көтлврт орулснд ханлтан өргв. Бат ясвр кегдсн деерән өдгә цага кергсл хулдҗ авгдхнь цус авлһна, хадһллһна болн эд-бод келһнә туслмҗин чинр кесг холванд өөдлүлхд туслхиг ах эмч заав. «Би энд хөрн һар җилдән көдлҗәнәв. Мана төвин көдләчнр ямаран таалд көдлдг бәәсиг сәәнәр меднәв. Бат ясврин хөөн энд көдләчнрин болн цусан өгхәр ирсн улсин төлә сән таал тогтагдхмн. Өдгә цага сән һара кергсл углҗ тәвгдхмн. Эн кергт 40 сай арслң йилһгдҗәнә. Тиим кергсл маднд урднь уга билә», – гиҗ Уташа Санҗ байрарн хувалцв.
Эндәс Хальмг Таңһчин Толһач Хаска Бату таңһчин залврин Ахлачин дарук Александр Мишаковла Элст балһсна төвд тосхгдҗадг гиичлүрт болн Сити-Чесст одв. Урднь бәәсн төсвин күрәлңгин герт ода ясвр кегдҗәнә, даруһас энд гиичлүр секгдхмн. Тосхлтын бүрдәцин эрдмч Саңһҗин Натальян келсәр, энд 50 хора бәәхмн, терүнәс хойринь эрмдгтә улсин төлә белдҗәнә. Намртан Элстд болх шар шаҗна нарт-делкән ик хург угтҗ энд күцәгдҗәдг тосхлтын көдлмш гүргүдән орв, ода энд җирн һар күн көдлҗәнә. Гиичлүрт 124 күн бәәҗ чадхмн. Сити-чесст Шатрин бәәшңд бас ясврин көдлмш кегдҗәнә, энд иргчдән баһчудын билг-эрдмин төв үүлдхмн. Тер мет эн бәәшң мана таңһчур ирсн гиичнриг соньмсулна, тегәд энд зуульчнрин төлә олн зүсн һәәхүл бүрдәгдхмн.
- Хальмг Таңһч чидл-омг өгдг һазр мөн. Әрәсән һардврин дөңгәр мана таңһчд шин объектс тосхгдҗана, урднь бәәсн бәәрнд бат ясвр кегдҗ шинрүлгдҗәнә. Үлгүрнь, Басан Городовиковин амрлһна бәәрнд бидн баһчудын Гер секвидн, ода тенд олн зүсн керг-үүлдвр давулгдна. Мана таңһч Әрәсән өвәрц болн ке-сәәхн регионмудын тоод орхнь лавта, –гиҗ Бату Сергеевич темдглв.

ДООҖАН Наталья