Түүмрәс саглулад

Шидр Хальмгин селәнә эдл-ахун министрин дарук Азда Эсена һардврт таңһчд түүмрин әәмшг уга бәәдл тогталһна төрәр селвлцән болв. Таңһчин МЧС-ин заллтын һардачин дарук Иван Мордасов болн райодын АПК-н әңгүдин һардачнр терүнд орлцв.

Селвлцәнә йовудт түүмр унтрадг шишлң техникин белдврт онц оньг тусхагдв. Тер мет таңһчд түүмр унтрадг мергҗлтнрин то бас ик биш, эн төрт бас оньг өггдв.
– Селәнә эдл-ахун аһу һазриг түүмрәс яһҗ харсхин тускар бас күүндвр болв. Тәрәнә һазриг шишлң татасар темдглх кергтә гисн седвәр орулгдв. Әәмшг уга бәәдл тогталһна олн зүсн эв-арһс олзлад, таңһчин эдл-ахус түүмрин әәмшгиг баһрулҗ болхмн, – гиҗ Азда Эсен товчлв.
ОЛЬДАН Цаһан