Сурһмҗин кергт эк-эцкнриг орлцулхар

Ноха сарин эклцәр Пятигорск балһснд бәәдг «Машук» медрлин төвин ул деер сурһуль-эрдмин төрәр Цугәрәсән керг-үүлдвр давулгдв. «Бичкнә цагин навигатормуд болн эк-эцкнрин ниигм: герлтә иргчин төлә кеҗәдг нөкцлт» гидг дуудвртаһар эн ик хург кегдв. Орн-нутгин цуг регионмудас ирсн 200 орлцачиг, тер тоод сурһульмудын һардачнрин селвгчнриг, регионмудын эк-эцкнрин ниигмин болн Әрәсән гегән-герлин Министерствин медлин эк-эцкнрин Цугәрәсән комитетин элчнриг негдүлв.

Городовиковск болн Яшалтан райодын муниципалитетмүдин зүүцүләч Дарья Шевченко, Хальмг этносойлын гимназин һардачин селвгч Саарла Чиңһс, Ик Царң селәнә 1-ч тойгта сурһулин һардачин селвгч Бадмин Елена, Б. Б. Городовиковин нертә Городовиковск балһсна олн салврта гимназин һардачин селвгч Наталья Шевцова, Городовиковск балһсна 2-ч тойгта сурһулин арвтын экнь Евгения Остапенко Хальмг Таңһчиг элчлв.
Цуг орлцачнр Әрәсән «Росдетцентр» гидг шаңһа бүрдәцин мергҗлтнрин сурһмҗин салврин шинҗләчнр кедг лекцст болн кичәлмүдт орлцв. Тер мет эдн үүдәгч янзта керг-үүлдврт, соньн харһлтд, кесг төсвин сессьт, сурһмҗин кесг төрәр кесн күүндврт орцлҗ медрлән гүүдүлв.
Ик хург секлһнә кемд Әрәсән гегән-герлин Министерствин элчнр болн сурһмҗин төрәр ик дамшлт хоршасн шинҗләчнр хургт орлцачнрин кесг сурврт тодрха хәрү өгв. Тер мет Әрәсән баатр, нисәч-сансрч Сергей Рязанскийлә болсн күүндвр цугтаднь, тер тоод мана таңһчин элчнрт, икәр таасгдв.
Сурһуль болн өрк-бүл хоорнд бат нөкцлт бүрдәлһнә күслиг ик хургт тәвҗәнә. Багшнр болн эк-эцкнр олз-тустаһар хамцу үүлдвр күцәлһнә чик эв-арһин тускар күүндвр кев, эндр сурһмҗин халхар һардг хурц кесг төрәр тоолврарн хувалцв, тедниг ууруллһна эв-арһ йилһҗ авв. Тер мет кесг селвгәрн хоорндан хувалцҗ талдан эк-эцкнрт тедниг тодлулв.
Мана таңһчин элчнр эн ик хургт орлцҗ бас дамшлтан болн медрлән гүүдүлв, эврә бүрдәцстән сурһмҗин олн зүсн эв-арһ олзлҗ эк-эцкнрлә күцәдг нөкцлтиг цааранднь өргҗүлхәр седҗәнә. Тиим тоолвран маднд Городовиковск балһсна олн салврта гимназин селвгч Наталья Шевцова медүлв.
-Маднла «Росдетцентр» гидг шаңһа бүрдәцин мергҗлтнр, тер тоод номтнр-профессормуд дамшлтарн хувалцҗ туста кесг селвгән өгв, терүг бидн эрк биш мана көдлмшт олзлхвидн. Иигәд бидн мана гимназин керг-үүлдврт улм өргнәр эк-эцкнриг орлцулхар шиидвидн, тиим мастер-класс маднд ик хургин йовудт үзүллә, мергҗлтнрин тер селвгнь маднд бас ик дөңгән күргәд бәәхнь лавта, - гиҗ Наталья Владимировна тоолвран медүлв.
Энүнә келсәр, сурһмҗин керг-үүлдврт орлцачнр хургин хөөн концерт хәләһәд, бичәчнрин үүдәлтлә таньлдв. Сул цагла эдн Железноводск балһснд одад экскурсь кев, балһсна соньн тууҗла, кесг ормсла таньлдв. Хәрү Хальмг Таңһчур йовҗ йовад, эдн Сарпуль балһснд Луганск Улсин Республикд бәәдг эврә үүрмүдлә харһв. Тедн бас Сарпульд болсн керг-үүлдврт орлцҗ дамшлтан байҗулв.
Йирдән Городовиковск балһсна гимназь болн ЛНР-ин Антрацитин района сурһульмудла кесг җилин сән хәрлцә бәрнә, нег-негндән гиичд одна, хамцу керг-үүлдвр онлайн таалд чигн бүрдәнә, хоорндан дамшлтарн хувалцна. Тиим нөкцлт ик туста болна.
ТҮРВӘН Һуна