Цергә белдврән чаңһаҗана

Өдгә цагт бичкдүд райодын болн таңһчин лагерьмүдт, Хар теңгсин көвәд амрчана. Тер тоод Целинн района «Сайгачонок» лагерьт таңһчин «Дәәч» төвин һардвр болн дамшачнр бүрдәсн цергә-спортын селгәнд 14-18 наста арвтнр кесг шин тоот медҗ авчана. Эдн «Уйн наста баатрмудын цаг» гидг сурһуль-эрдмин көтлврәр белдвр авчана.

Одахн лагерьт тавдгч тиим селгән эклв. Элстин болн райодын сурһульмудын күүкд-көвүд, ут турштан 80 күн, соньн көтлврәр медрл болн эв-дов дасч авчана. Курсантнрин тоод авлһна керг-үүлдврт орлцад, ода арвтнр тиим өөдән нериг цугтан зүүнә.
Сәәнәр амрхин төлә лагерьт цуг таал бәәнә. Одахн энд кесг арвад сай арслңга бат ясвр келә. Өдгә цагин бассейнд цергә кичәлмүдин хөөн бүлән уснд өөмҗ цогц-махмудан батрулҗ болҗана. Цугнь шинрүлгдв, кичәл, харһлт келһнә аһунь цеврлгдәд оңдарулгдв. Тер мет лагерин хаша-хаацин дотрк кесг талвңгуд шинрүлгдв, хот-уудг хорад шин кергсл тәвгдв, энд замчнр шимтә-шүүстә хот белднә, сурһульчнр өдртән тав дәкҗ хот ууна. «Бидн энд сәәнәр амрчанавидн, мана таңһчин болн талдан региона көвүд-күүкдлә таньлдвидн, цергә дамшачнр маднд туста кесг тоотыг дасхҗ, чаңһ-чиирг болтн гиҗ сурһмҗ өгнә, тернь маднд таасгдна, сурһульд өгдг кичәләс төрүц оңдан болна», – гиҗ цергә-спортын селгәнд ирсн арвтнр келнә.
Эднәс кесгнь эврә селәнә, района, балһсна сурһульд цергә кесг тоотыг дасла, марһанд орлцла, тиим болв чигн сән таалта лагерьт амрад, шин үүрмүдән олҗ авад цаган ик тустаһар давулна. Нег хамцулд дигтә-даратаһар олн зүсн даалһвр күцәдгиг эдн дасҗ авна.
Тер мет тактикин белдврин, эмнлһнә түрүн дөң күрглһнә, автомат цуцлһна болн цуглуллһна эв-дован эдн ясрулна, улм түргәр тер амр биш кергиг күцәдгиг дасна, дамшачнр теднд дөң болна. «Бидн хамгин түрүнд арвтнрт төрскнч сән сурһмҗ өгх зөвтәвидн. СВО-н баатрмуд лагерьт болдг харһлтд ирнә, йирдән болхла мана дамшачнр цугтан СВО-н ветеранмуд болҗана, эдн эврә цергә цагин тускар бас кесг тоот келҗ өгч чадҗана. Цергә -спортын селгә бүрдәлһнә ик дамшлт мана «Дәәч» төвин көдләчнр хоршасн бәәнә», – гиҗ дамшач, СВО-н ветеран Михаил Нахошкин келнә.
Дамшачнр цергә кесг эрдмд сурһульчнриг дасхна, эҗго теегт, күүнә һазрт дарунь чик хаалһ яһҗ олҗ авдгиг тодрхаһар цәәлһнә. Әрәсән болн Хальмг Таңһчин тууҗин тускар эдн бас соньн кесг тоот медҗ авна, одахн эднд делкән түрүн дәәнә, түүнд зөргтәһәр орлцсн Әрәсән баатрмудын тускар келҗ өгв. Тер мет эдн кесг спортын, билг-эрдмин марһанд болн наадмд орлцҗ, квестмүдт медрлән гүүдүлҗ иньгллтән батрулх. Хойр долан хонгтан болдг нег селгән эднә төлә агчмин зуур давх гиҗ латаһар келҗ болҗана.
Аһарин-десантын цергин өдрт нерәдҗ «Сайгачонок» лагерьт «Төрскндән церглҗәнәв» гидг Цугәрәсән керг-үүлдвриг орн-нутгин «Медрл» ниицәнә Хальмг Таңһчин әңг болн «Төрскән харсачнр» гидг Цугәрәсән саңгин Хальмг әңг бүрдәв. Түүнә йовудт «Медрл» ниицәнә лектор, СВО-н ветеран, «Дәәч» төвин һардач Җаңһан Чимид, СВО-н ветеран Мингиян Нахошкин, «Төрскән харсачнр» әңгин һардач Хаалһин Очр эврә дәәч хаалһин тускар келҗ өгв. Теднә келвр арвтнрт икәр таасгдад, соньмсулв.
«Бидн «Дәәч» төвин ветеранмудла кесгәс нааран нөкцлтҗәнәвидн. Эдн баһчудт, дорас өсҗ йовх үйнрт эврә бәәдл-җирһлин тускар келәд мана ниицәнә керг-үүлдврт орлцҗ Төрскндән яһҗ итклтәһәр церглхин тускар келҗ өгч сән үлгүр болна. Ода тиим керг-үүлдвр цуг орн-нутгар давулҗана. Мана ниицәнә мергҗлтнр тууҗар болн нань чигн төрәр лекц умшчана, тиигҗ бидн бас арвтнрин медрлинь кесг төрәр гүүдүлҗәнәвидн», – гиҗ таңһчин «Медрл» ниицәнә һардач Манҗин Элеонора цәәлһв.
Тиим кевәр уйн настнр тустаһар цаган давулҗ, цергә белдвр авч, цогц-махмудан батрулҗана. Эднд тиим соньн амрлһн кесгтән тодлгдад бәәх, иргчдән эдн төрскндән итклтә улс болҗ өсх гиҗ батар ицҗ болҗана.

ТҮРВӘН Һуна