Өргмҗтә сәәхн байр

Вчера, 19:46 | Общество, Таңһчин зәңгс, Зіњг

Бемб өдрлә Лаганя районд Бадм цецгин наадм болв. Җил ирвәс әрүн чинртә бадм цецгиг һәәххәр Әрәсән регионмудас ирдг зуульчнрин то өсәд йовна. Байрин керг-үүлдврмүд өрүн эрт Лагань балһсна «Көк теңгсин айсмуд» паркд эклв. Тенд «Lagan Sup Challenge», волейболар, мини-футболар болн бөк бәрлдәнә марһас болв. Энүнд олн-әмтн орлцад, чидлән сөрв.
Сапсерфингәр болсн марһанд орлцхар олн-әмтн зөвән өгв. Эннь хамгин соньн йовдл болв. Марһан залу болн күүкд улсин дунд давулгдв. Залу улсин дунд ончрсн Аһш балһснас ирсн Василий Борщин келсәр, сәәхн йиртмҗ марһана төлә сән таал тогтав, цаһан седклтә улс гиичнриг бүләнәр тосснь энүг байрлулв. Волейболар болсн марһанд нег һазра улс болн ирсн гиичнр бас шунмһаһар орлцв. Темдглхәс, энүнд Луганск балһснас ирсн элчнр орлцсн болдг. Бөк бәрлдәнә марһан болхла эн җилин хаврар сәәһән хәәсн нертә спортсмен, Хальмгин Баатр Карун Санҗин санлд нерәдгдв. Терүнд баһ наста көвүд бас олар орлцад, кесгнь ончрв. Нег һазра арһлачнр, эрдмчнр эврәннь кегдлмүдән хулдв. Эннь болхла олн зүсн наадһас, хальмг махлас, мөрд, темәд болн талдан кегдлмүд мөн. Зуульчнр соньмсад, кегдл болһна тускар цәәлһвр сурад, хулдҗ авв.
Бадм цецгин наадм Джалыково селәнд бас бүрдәгдв. Үдин хөөн олн гиичнр, зуульчнр экләд цуглрв. Тенд бәәдг Галсанг хурлд ирсн улсин төлә һәәхүл болн экскурсь бүрдәгдсн билә. Терүнәс нань гиичнр оңһцар йовад, бадм цецгин цецгәрлтиг һәәхв. Тер мет домбр цокдг болн хальмг би дасхдг мастер-класс болв.
Тер өдр асхн байрин һол керг-үүлдвр Лаганьд давулгдв. «Көк теңгсин айсмуд» паркд байрин концерт болв. Терүнә йовудт спортын марһаст ончрсн болн Лаганя района делгрлтд тәвцән орулсн улс ачлгдв. Тедн дунд Михаил Богатовд, Манҗин Надеждад, Борис Кинжеевд болн Ольга Баканевад Лаганя района күндтә иргнә нерн зүүлһгдв. Байрин йовудт Элст балһсна Хургин депутат, цергә шишлң керг-үүлдврин ветеран Чумуда Николай орлцад, нег һазра улсан йөрәв. Энүнә темдглсәр, хальмгудын төлә бадм цецг әрүн чинртә болна, эн Хальмг Таңһчин тугт зурата. Наадмд олн зуульчнр ирәд, күн болһн мана йиртмҗин сәәхниг үзҗ, цаган сергмҗтәһәр давулснь темдгтә болв гив.
Байрин концертин йовудт Лаганя района сойлын коллективс, «Бамб цецг» ансамбль болн таңһчин нертә артистнр орлцад, билг-эрдмәрн байрлулв.
Бадм цецгин наадм Көк теңгсин көвәд давулгдҗахинь темдгтә. Хальмгуд шар шаҗнд шүтдг улс, тегәд эн әрүн цецг мана бурхн-шаҗна темдг болна. Дәкәд тодлхас, эн керг-үүлдвр һаха сард Элстд болх Шар шаҗна нарт-делкән чуулһ угтад давулгдснь бас темдгтә болв гиҗ келх кергтә.
– Бемб өдрлә Лаганя район олн гиичнрән тосв. Җил ирвәс Бадм цецгин наадмд ирдг гиичнрин то өсчәнә, эннь йир байрта йовдл, тер юңгад гихлә, Хальмг Таңһчин тускар олн-әмтн соңсад, нааран олар ирнә. Оңһцар йовад, әрүн чинртә цецгин цецгәрлтиг үзәд, цуһар өврнә. Күн болһн төрскн һазр-уснаннь зөөрән хадһлҗ, дорас өсч йовдг үйнрт медүлх зөвтәвидн, – гиҗ таңһчин Толһач Хаска Бату эврәннь ниигмин сүлҗәнә халхст темдглсн болдг.
Бадм цецг – цевр, сәәхн, әрүн чинртә темдг мөн. Тегәд наадм җил болһн давулгдҗ, мана таңһчд зуульчллһн делгрҗ, җил ирвәс нааран гиичнр олар ирхнь лавта.
КАРСАНА Евгения

Видео