Орн-нутгин «Абилимпиксин» дөрлдән неквртә болв

СВО-н ветеран Ханан Дольган шалтгта дәәчнрин төлә бүрдәсн Цугәрәсән «Абилимпикс» чемпионатд шунмһаһар орлцв. Зург цокачнрин марһанд хойр часин эргцд нег күүнә һол зург цокч жюрин даалһвриг күцәх зөвтә бәәсмн. Дольган арвн җилдән зург цокдг кергәр соньмсҗана, болв хамгин түрүнд йиртмҗиг болн эргндк һазрин сәәхн тоотыг цокхдан дурта. Зуг цергә шишлң керг-үүлдврт орлцҗасн саамд зург цоклһна төлә чөлән уга бәәсмн.
Түүнлә хамдан Хазн балһснд болсн «Абилимпиксин» марһанд бас нег ветеран Васкен Баатр орлцҗ домбр цокҗ билг-эрдмән үзүлв. «Цаһан Сар»гидг дууг домбр цокад дуулсмн. Дун әмтнд урмд өгнә, җирһлин түрмшгиг мартулна гиҗ ветеран тоолҗана. Тегәд эн марһанд дуучнрин әңгд орлцхар седв.СВО-н ветеранмуд орн-нутгин дөрлдәнд эврә өөдән мергҗлтән үзүлх зөвтә гиҗ «Төрскән харсачнр» гидг таңһчин саңгин көдләчнр цәәлһв. Хазнд СВО-н ветеранмуд-эрмдгтә улсин төлә болсн Цугәрәсән марһан теднә мергҗлтинь цааранднь өөдлүлх таал тогтах күсл бас тәвҗәнә. Дөрлдән така сарин 25-ас авн 29 күртл болв. Тенд Хальмг Таңһчин тавн элч «Зург цокач», «Веб-көдлмш», «Электромонтаж», «Билг-эрдм (дууч)» гидг әңгүдәр шунлттаһар орлцад, медрлән болн билг-эрдмән үзүлв. Болв нүүрлгч ормд эдн күрсн уга. Тернь түрүн орлцлһна невчк һундлта ашнь болв. Йирдән марһанд 70 һар финалистнр йилһҗ авгдв.
Хулһн сард жюри теднә тооһас йилһән сән орлцачнриг йилһҗ авч тедниг ашлгч девсңд дуудх. Ханан Дольганд бәрсн ашнь бас таасгдҗахш. Оньдин нүүрт йовдг күн дарук марһанд улм сәәнәр белдхәр седҗәнә. «Зург цокачнрин марһанд орлцхин төлә сән өдгә цагин техник-фотоаппаратмуд кергтә. Тиим нег сән юм би одахн олҗ авлав. Ода зург цоклһнд цааранднь бийән дамшулх кергтә. Жюрид мини цоксн зургуд таасгдв, болв теднә чинрнь му бәәсмн, яһад гихлә күцәмҗд күрхин төлә сән, ик үнтә өдгә цагин аппарат кергтә. Тиим техникин төлә марһанд орлцачнр мөңгән хармнхш, ик үнтә юм олзлна, ода маднд бас тер кемҗәнд күрх кергтә»,- гиҗ Дольган санаһан келнә.
Кезә чигн нүүрт һардг баһ наста ветеран «Абилимпикс» Цугәрәсән марһанд чигн күцәмҗд күрх гиҗ бидн батар ицҗәнәвидн, яһад гихлә Дольган эрк биш күслдән күрдг күн. Ода Баһ Дөрвдә РМО-н депутат болхар седҗәнә, тиим нег мөслгч хәләцтә, оньдин диилврт күрхәр седдг кандидат района әмтнә төлә туста кесг керг күцәҗ чадх, гиҗ лавтаһар келҗ болҗана.
СВО-д церглҗәдг мана дәәчнрт чигн Дольган Юрьевич тасрхан угаһар дөңгән күргнә, теднә даалһсиг эрк биш күцәхәр седнә, өдгә цагин техникиг, хот-хоолыг мана зөргтә баһчудт күргнә. Удл уга көлгнә жолач болад, СВО-н керг-үүлдвр болҗадг Макеевка балһсн тал йовҗана, тенд күләҗәдг үнтә ацаг зөөһәд күргҗ ирх.
Гемтә-шалтгта СВО-н ветеранмудыг дөңнлһнә тиим Цугәрәсән марһаг Келн-улсин «Абилимпикс» төв болн «Төрскән харсачнр» Әрәсән саң бүрдәҗәнә. «Тиим марһан шин эрдм дасч авхд, урмдта хәләцән батрулхд, җирһлин шин керг-эрдм олҗ авхд эрмдгтә ветеранмудт дөң болна. Тиим кевәр эдн эврәннь үүрмүдтән чигн сән үлгүр үзүлҗ урмд өгх.
«Тиим марһаг бидн җил болһн СВО-д орлцачнр дунд бүрдәхәр седҗәнәвидн. Мана баатрмуд тиим кевәр реабилитацин хаалһд орҗ чидлән хоршах. Аштнь бидн «Төрскән харсачнр» саңла хамдан СВО-н ветеранмудыг дөңнлһнә системиг тогтаҗ чадхвидн, түүнә төлә түрүн ишкдл кегдсн бәәнә. Хазнд болсн чемпионат терүг иткүлҗәнә», — гиҗ Келн-улсин ИРПО «Абилимпикс» төвин һардач Дина Макеева чемпионатын йовудт темдглв.
Тер мет РФ-н харслтын министрин дарук, «Төрскән харсачнр» саңгин ахлач Анна Цивилева Хазнд болсн СВО-н орлцачнрин «Абилимпикс» - 2025 чемпионатд ирҗ, ветеранмудла харһҗ, байрин хургин йовудт финалистнриг ачлв. «Тедниг өрк-бүлнь бәәтхә, цуг орн-нутг күләҗәнә, гиҗ госпиталин хөөн гер талан ирсн ветеранмуд медх зөвтә. Цуг Әрәсәһәс нааран СВО-д орлцачнр ирв. Кесг эрдмәр мергҗлтән үзүлдг «Абилимпикс» чемпионат эдниг негдүлв.
Эрдмин тоог икдүлх кергтә гиҗ ветеранмуд селвгән нанд өгв. Татарстана хотл балһсар кесн экскурсь эднд йир икәр таасгдв гиҗ седклән келв. Көдлмшән эдн яһҗ олҗ авчана, эмнлһнә реабилитац теднә төлә яһҗ күцәгдҗәнә гиҗ күүндләвидн.Саяд улсин төлә баатрмуд-ветеранмуд үлгүр болҗана», — гиҗ Анна Цивилева заав.
Кесг ветеранмуд ода сурһульмудт одад күүкдт СВО-н тускар келҗ өгнә, залу-зөргин кичәлмүд кенә, тер мет Әрәсән «Медрл» ниицәнә кедг төсвин кемҗәнд лекц умшна. Тегәд ораторин, келмрч эрдмтә улсин дөрлдәг чемпионатын ханьд бүрдәх кергтә, гиҗ ветеранмуд некв.
Тиим кевәр ода цуг регионмудын, тер тоод Хальмг Таңһчин ветеранмуд дарук җилин «Абилимпикс» чемпионатын марһанд орлцхар белдҗәнә, улм өөдән ашт күрхәр седҗәнә. Эднд бидн күцәмҗ дурдҗанавидн, тәвсн күслдән күрч, олнд үлгүр болҗ орн-нутгт болн таңһчд туста кергәрн нерән дуудулҗ йовтха.
ҖААХАН Бадм