Дамшлтан хоршаһад үзмҗән өөдлүлх

Одахн Пенза балһсна эргнд бәәдг «Меридиан» лагерьт «Әәмшг уга бәәлһнә сурһуль» гидг Цугәрәсән XIX марһан төгсв. Энүг Әрәсән МЧС болн гегән-герлин Министерств бүрдәв. Эн җил орн-нутгин марһанд 180 сурһульч орлцв, эдн эврә округан болн 13 регионан элчлв.
Хальмг Таңһчиг болн ЮФО-н регионмудыг зуульчлһна болн эврә һазран медлһнә бичкдүдин-уйн настнрин Хальмгин төвин хамцул элчлв. Түүнә ханьд Көтчнрә района Ергенинский селәнә сурһулин, Көтчнрә олн салврта гимназин болн Приютна селәнә лицейин сурһульчнр орлцв.
Арвн өдрин эргцд көвүд-күүкд эврә эв-дован кесг кичәлин марһанд үзүлв. Җирһлин күнд бәәдләс һарлһна, күүнә әм аврлһна болн цогц-махмудан батруллһна эв-арһан арвтнр үзүлв. Дөрлдәнә көтлврт кесг дамшуллһн орла, тер тоод җирһлин күнд-күчр таалд дөрвн өдртән бәәҗ заасн хаалһиг сурһульчнр давҗ һарх зөвтә бәәсмн. Тер мет хәәврин болн әм аврлһна көдлмш күцәһәд, саалтг-боомтгин дел давҗ һарад, түүмр унтрадг олн салврин эстафетд, гүүлһнә кросст орлцад, чаңһ-чииргин олн халхин дамшуллһ кеһәд, ЧС-ин таалд чик үүлдвр күцәх зөвтә бәәсмн. Хальмг Таңһчин багин һардачнр РЦДЮТиК-ин методистнр Карсан Руслан, Бутан Ирина болн Ергенинский селәнә сурһулин физическ сойлын багш Овкаҗин Дольган болв.
– Мана таңһчин багин элчнр Цугәрәсән марһанд бийән сәәнәр үзүләд, белдврин өөдән кемҗәһән медүлв. Тиим кевәр Хальмгин сурһульчнр орн-нутгин кемҗәнд чигн бат медрлән болн эв-дован үзүлв, – гиҗ Бутан Ирина келв.
Тер мет Ергенинский селәнә сурһулин һардач Довуркан Байрта эврә сурһульчнрин күцәмҗәр бахмҗ кеҗәнә. «Кесг җилин эргцд мана арвтнр 7-10-ч классмудын күүкд таңһчин, ЮФО-н болн Цугәрәсән марһаст орлцҗана. Мана арвтнр сурһулин нерән таңһчд бәәтхә, цуг ЮФО-д дуудулҗ йовна». Эн ик туста кергин эклцд мана багш, ода СВО-д орлцач Дорҗин Бембә йовла. Физическ сойлын багш Овкаҗин Дольганла хамдан эдн сурһульчнриг зуульчллһна болн МЧС-ин кергт орлцулҗ теднд урмд өглә», – гиҗ Байрта Бембеевна келв.
Сурһулин нер дуудулҗадг арвтнрт тер мет эк-эцкнр, таңһчин сурһуль-эрдмин министерств болн МЧС-ин заллт олн зүсн кергсл келн-улсин кесг төсвин кемҗәнд хулдҗ авна. Зуульчллһна болн һазран медҗ авлһна таңһчин төвин методист Бутан Ирина болн талдан дамшачнр ЮФО-н болн РФ-н марһаст сурһульчнриг белднә. Тер мет 9-ч классин сурһульч Манҗин Адьян ЮФО-н болн Әрәсән марһанд яһҗ орлцсан келҗ өгв. «Нанд Пенза балһснд таасгдв, бидн ө-шуһу модн дотр лагерьт марһлдҗалавидн. ЮФО-н болн таңһчин дөрлдәнлә дүңцүлхлә Әрәсән марһана көтлвр җаңһрта болв, зәрм девсңгиг түрүн болҗ үзҗ орлцлав, тернь невчк күнд болв».
Давсн җил Ергенинский селәнә арвтнр ЮФО-н марһана дииләчнр болла. Баһ наста багин элчнр болхла 3-ч орм эзлв, тернь бас ик күцәмҗ болснь лавта.
Ирх җилд таңһчин дөрлдән мөчн сард Яшалтан района «Лесная сказка» лагерьт болхмн, ЮФО-н марһан – Ростовбалһснд, РФ-н дөрлдән-Ханты-Мансийск балһснд болх, тер марһаст бидн белдҗәнәвидн. Давсн җилд Адьян эврә үр Ольцона Сарңла хамдан «Артекд» амрла. Тиигҗ өөдәнәр эднә күцәмҗ үнлгдв.
Талдан сурһульмудын арвтнр болхла эднәс үлгүр авад марһанд улм өргнәр орлцтха, тедн дунд бас шин дииләчнр өсхнь лавта.
ТҮРВӘН Һуна