Ик сурһульд орх арһан икдүлв

Эн җил сурһулян төгсәсн арвтнр дунд ЕГЭ шүүвр өгсн кемлә 200 балл эс гиҗ тер тоод өөрхн балл хоршасн сурһульчнр баһ биш. Тедн дунд И. Г. Карпенкон нертә Приютна лицейин төгсәһәч Софья Полежко райондан түрүн болҗ 200 балл хоршасн болҗана. Хойр кичәләр-химийәр болн орс келәр цуг даалһвриг чикәр күцәһәд, күүкн тиим кевәр хойр зууна болн хамгин өөдән ашт күрв.

- Би тасрхан угаһар шүүврт белдҗәләв, Интернетин эв-арһиг чигн олзлҗалав, мини эк-эцк нанд дөң болҗала. Мана лицейин багшнр 11-ч класст мадниг тасрхан угаһар ЕГЭ-д белдҗәлә. Би эмч болхар седҗәнәв, тегәд мана биологийин болн химийин багш Нелли Ивановна Лепинцева өгдг кичәлмүд болн немр сурһуль намаг хамгин түрүнд соньмсулҗала, гиҗ Софья шүүврт яһҗ белдҗәснә тускар келҗ өгчәлә.
Орс келнә багшнь Нелли Юрьевна Корчагина бас төгсәһәчнрин белдврт ик оньган өгчәлә, тиим кевәр Софья эн хойр кичәлин шүүврән Приютна района тууҗд түрүн болҗ тиим өөдән ашт күрч эк-эцкнрән, багшнран, сурһулин һардвран байрлулснь лавта. Эврә бат медрл-чадмгтан чигн күүкн кезә чигн иткҗәлә.
«Софья йилһән сәәнәр сурчала, түүнлә дегц көгҗмин болн Приютна селәнә Кирс босхлһна чонҗин нарн өдрин сурһульмуд төгсәлә, тиим кевәр олн зүсн билг-дасмҗ хоршасн күүкн болҗана. Лицейиг алтн медальтаһар төгсәв. Ода цуг төгсәһәчнр вузан йилһҗ авв. Софья Кубанск эмнлһнә күрәлң шүүҗ авла, түүнд һаха сарин нег шинәс авн сурһулян сурх, тиим зөвән өгчклә. Билгтә күүкн «Сотка» гидг онлайн сурһульд дасла болн репетитормудас дөң авчала. Сурһульдан күцәмҗ бәрҗ сәәнәр эрдмән дастха гиҗ бидн Софьяг йөрәҗәнәвидн», – гиҗ лицейин һардач Ольга Медведева бахмҗтаһар келнә. Сурһуль-эрдм гиснтн-энтн бийиннь арһ-чидлән медҗ авлһна болн медрлән гүүдүллһнә эв-арһ болҗана, гиҗ Ольга Павловна цааранднь темдглв. Шүүврт сәәнәр белдхин төлә бийән бәрҗ цуг оньган шүүҗ авсн кичәлдән өгх кергтә, тер мет герин көдлмшән чигн болзгтнь болн сән чинртәһәр күцәх кергтә. Кичәлән дассн деерән, терүгәр икәр соньмсҗ, немр материал олҗ авч, химийд, орс келнд цуг дуран өгх кергтә гиҗ һардач заав.
Тер мет орс келнә шүүвриг сәәнәр өгхин төлә кесг дегтр умшх кергтә, тиигхлә үгин көрң немгдәд бәәх. Софьяд эврәннь дегтрин саң бәәнә, терүг күүкн эврән цуглулҗала, гиҗ Ольга Павловна цааранднь темдглв. Ода селәнә эс гиҗ балһсна сурһульд күн сурчахнь йилһл уга. Интернетд ода кесг курсмуд, онлайн сурһульмуд бәәнә. Седкл бәәхлә йилһән сәәнәр белдҗ болҗана. Зун балл хоршасн сурһульч багшин келсиг түргәр медҗ авсн деерән, медрлән гүүдүлх ик седклтә болх зөвтә, тернь күцәмҗин бат улнь болҗана. Шүүврин кемд седклән чаңһаһад, үүмән угаһар медсн цуг тоотан дигтәһәр олзлх кергтә, гиҗ Приютна лицейин һардач Софьян тускар келҗ ашлв.
Тиим өөдән ашт күрсн талдан чигн кесг сурһульчнр бәәнә. Тер тоод Элстин лицейин төгсәһәч Квон Джувон тууҗар болн обществознаняр 100 балл авад, 200 гисн үзмҗд күрв.
Хальмг ик сурһульд орсн билгтә оютн Атешә Алдр Элстин 21-ч тойгта сурһулиг төгсәлә, биологийәр 100 балл, химийәр 90 балл хоршала. Тиим сурһульчнрин төлә хальмг вузин һардвр 100 миңһн арслңга мөрә өгхәр шиидв, тер мөрәг Алдр бас авсна хөөн ик байрта бәәнә. Билгтә талдан төгсәһәчнр мет, Алдр олнд туста ик җалвта, ик иргчтә эрдм дасхар седҗәнә. Аштнь көвүн нефтехимий гидг эрдмиг шүүҗ аав. Тиим эрдмәр Хальмг ик сурһульд дасхна. Өөдән балл авсн талдан төгсәһәчнр Москван, Санкт-Петербургин болн талдан балһсна вузмуд шүүҗ авсн болхла, Алдр эврәннь таңһчин төрскн вуздан сурхар седв. Яһад гихлә энд элгн-саднь, үүрмүднь бәәнә, теднәс салхар седсн уга. Ээҗнь чигн Хальмг ик сурһуль чиләлә, ода Москвад эсвин багшар көдлҗәнә. Түүнә үлгүрәр Алдр бас хальмг вузд сурхар шиидв, тернь мел чик гиҗ сангдна, яһад гихлә талдан балһснла, талдан вузла кесгтән иҗлдх кергтә, Элстд болхла цугнь таньлтта, цугнь өөрхн мөн. Күнд кемлә элгн-саднь, үүрмүднь чик селвг өгәд дөң болад бәәхмн.
Ут турштан таңһчар 30 күн 100 баллтаһар нег кичәлин шүүврән өгв. Билгтә мана арвтнриг бидн күцәмҗләнь йөрәҗәнәвидн. Седклдән өөрхн эрдм шүүҗ авад таңһчдан туста иргнмүд болҗ өстн гиҗ дурдҗанавидн.
ТҮРВӘН Һуна