Цугәрәсән селвлцәнд шин төр тәвгдв

Одахн Москвад Әрәсән залврин Ахлачин дарук Дмитрий Чернышенко болн гегән-герлин министр Сергей Кравцов РФ-н субъектсин министрмүдлә селвлцә кев. Түүнд Хальмг Таңһчин сурһуль-эрдмин болн номин министрин үүл дааҗадг Александр Ким орлцв. Энд 2024/2025 сурһулин җилин ашнь диглгдв болн 2025/2026 сурһулин җилд күцәх һоллгч төрмүд йилһгдв. Төрскән харсачин җилин кесг седвәриг болн керг-үүлдвриг күцәлһнд шунлттаһар орлцснднь Дмитрий Чернышенко багшнрт ханлтан өргв. Тер мет Төрскән харсгч Алдр дәәнә ветеранмудын болн СВО-д орлцачнрин ик ач-тусинь заав.

Һаха сарин 1-д цуг орн-нутгар 18 сай һар күүкд сурһульд ирх, тер тоод негдгч класст 1, 5 сай бичкдүд орх. 28 субъектд 43 сурһулин шин гер секгдх гиҗ вице-премьер темдглв. Тер мет давсн җил шалтгта бичкдүдт юм даслһна сән таал тогталһар ик көдлмш күцәгдлә. Һол төриг заахла, сурһулин шин җилд йиртмҗ шинҗллһнә-номин эрдм-сурһулиг делгрүлх кергтә гиҗ вице-премьер темдглв. ЕГЭ-н шүүвриг тиим кичәләр сән аштаһар өглһн арвтнр дунд өсчәнә.
Эн җил багшнрин вузмуд 40 миңһн мергҗлтнриг белдҗ һарһв. Әрәсәд ода 1 сай һар багшнр бәәнә. «Работа России» туслмҗд 30 миңһн орм заагдҗана. Шин җил багшнрин җалв өглһнә таалыг улм үнн-чик болн медгдм кевәр тогтах кергтә. Ода багшнрин вузмудын оютнр 3-ч курсин хөөн сурһульд эс гиҗ колледжд багшлх зөв авчана. Колледҗмүдт орулҗ авлһна кампаниг сәәнәр бүрдәснд вице-премьер селвлцәнд орлцачнрт ханлтан өргв.
«2019 җиләс авн колледжд орсн арвтнрин то җил болһн 200 миңһн күүнд өснә. Энтн үзмҗтә өслт мөн. Тер мет 9-ч классин хөөн СПО-н бүрдәцд орх улсин то 15 процентд өсв. Орулҗ авлһна кампань цааранднь болад бәәнә, болв эндр 3 сай 300 миңһн эрлһән абитуриентнр орулв. Эннь давсн җилин үзмҗәс 890 миңһнд үлү болҗана.
«Профессионалитет» гидг шаңһа төсвиг болн келн-улсин «Баһчуд болн бичкдүд» төсвиг сәәнәр күцәснә ашнь болҗана, гиҗ Дмитрий Чернышенко темдглв.
«Профессионалитетин» көтлврт 930 миңһн эрлһн орв, тернь давсн җилин үзмҗәс 1,7 холванд икдв. Техникин мергҗлиг дасх седкл сурһульчнр дунд өсчәнә. Түүнә төлә 86 регионд 506 кластер тогтагдсн бәәнә, тер тоод 13 кластер шин регионмудт болн меҗән өөрк һазр үүдәгдлә.  Индустрийин нөкцлтнрин тоод 2,5 миңһн салг-үүлдвр йовна, колледжмүдт орулсн инвестицин то 8,5 җува арслңгас үлү болв.
«Төрскнч седклтә, социальн дааврта иргнмүдиг өсклһн орн-нутгин авъясин ул деер күцәгдх зөвтә, тиим даалһвриг Президент Владимир Путин тәвҗәнә. Колледжмүдин селвгчнр тер көдлмшиг күцәҗәнә», – гиҗ Дмитрий Чернышенко келв.
«Сурһуль-эрдмин инфраструктуриг делгрүллһнә халхар баһ биш көдлмш күцәгдв. 2019 җиләс авн 1688 бичкдүдин сад-ясль тосхгдв, эзнә садмудт 20 миңһн орм тогтагдла, 1644 сурһулин гер эдлврт орулгдла, түүнд 1 сай һар күүкд дасх.  2024 җил эн көдлмш цааранднь кегдв, 293 сурһуль тосхгдв болн 847 герт бат ясвр кегдв. Эн җил 80 шин сурһуль эдлврт орх болн 1279 герт бат ясвр кегдх, тиим кевәр юм даслһна төлә күүкдт сән таал тогтагдҗана гиҗ гегән-герлин министр Сергей Кравцов темдглв.
Тер мет Хальмг Таңһчд эн җилд Элстд болн райодар 10 сурһульд болн 2 садт бат ясвр кегдҗәнә, һаха сарин 1 күртл тер көдлмш төгсх зөвтә. Элстд Хальмг келн-улсин гимназьд, 5-ч болн 24-ч тойгта садмудт тосхачнр көдлҗәнә, көдлмшин ик зууһинь эдн дууссн бәәнә, медрлин өдрин байрла бичкдүд болн арвтнр шинрүлгдсн гермүдтән орҗ байрта-бахтаһар цааранднь сурх, сурһмҗлачнрин оньгт өсч босх гиҗ лавтаһар ицҗ болҗана. Яһад гихлә эн тосхлтс балһсна болн таңһчин һардврин һол оньгт бәәнә. Гермүдин өөрк ормс бас шинрүлгдх.
Тер мет «Баһчуд болн бичкдүд» келн-улсин шин төсвәр Яшкулин школ-интернат, Баһ Дөрвдә гимназь, Яшалтан района Октябрьск селәнә сурһуль, Хар Һазра района Адг селәнә сурһуль, Октябрьск района Цаһан Нур селәнә сурһуль, Городовиковск балһсна 3-ч тойгта сурһуль, Целинн района Троицкое селәнә гимназь, Лаганя района Улан Хол селәнә сурһуль, Көтчнрә района Чкаловский селәнә сурһулин гермүдт бат ясвр төгсҗ йовна.
Арвад җилин туршарт ясвр уга бәәсн гермүд ода өдгә цагин таалла ирлцәтәһәр шинрүлгдәд селәдин кеермҗнь болхмн, энд тосхлтын бүрдәцс бас райодын һардврин, депутатнрин, эк-эцкнрин, багшнрин бүртклһнә таалд көдлҗәнә, тегәд цугнь сән чинртәһәр кегдх гисн бат иткмҗ бәәнә. 2022 җиләс авн 2024 җил күртл мана таңһчд 47 сурһульмудын гермүдиг шинрүллһнә көдлмш күцәгдлә, түүнә йовудт ик дамшлт хоршагдла, терүг олзлсна ашт чигн 2025 җил цугнь дигтә-даратаһар дуусгдхнь лавта.
Тер мет Сергей Кравцов зуни цагин амрлһна түрүн ашин тускар келв. Хойр селгәнә эргцд 4,5 сай сурһульчнр лагерьмүдт амрв, Хальмг Таңһчд чигн бичкдүд болн арвтнр Элстин болн райодын лагерьмүдт амрч олн зүсн керг-үүлдврт орлцҗ, медрлән гүүдүлҗ, төрскнч болн цергә сурһмҗ чигн авч амрчана. Сурһулин шин җил күцәх кергин тускар министр бас келв. Орн-нутгт сурһуль-эрдмин хамцу аһу тогтагдх, тер кергт министерствин шишлң заквр нерәдгдҗәнә. Кичәлмүдин хамцу зура орулгдх, бүртклһнә көдлмшин то кемҗәлгдх.
Селвлцәнә йовудт салврин нүүрлгч көдләчнр ачлгдв.
ТҮРВӘН Һуна