Мана баһчуд ик сурһульд орв

Ода вузмудт 2025 җилин абитуриентнриг орулҗ авлһна керг-үүлдвр төгсҗ йовна. Эднәс ик зунь ямаран ик сурһульд орхан йилһәд авчкла, тиим болв чигн ноха сарин 29 күртл вузан сольх талдан шиидвр батлх арһ өггдҗәнә. Тиим кевәр абитуриентнрин зөв өргҗүлгдҗәнә, болв һоллгчдан цуг баһчудыг бюджетин болн бооцана (мөңгән өгәд) әңгд орулҗ авлһн төгсв, тер тоод Хальмг ик сурһульд тиим керг-үүлдвр күцәгдсн бәәнә. Таңһчин кесг райодын арвтнр хальмг вузиг шүүҗ авла. Тер тоод Хар Һазра района Комсомольский селәнә гимназин сурһульчнр бас йовна.

– Эн җил Басңга Баатрин нертә мана гимназиг 16 сурһульч төгсәв. Эднәс 6 күн йилһән сәәнәр сурад, олна керг-үүлдврт, олимпиадмудт орлцад, алтн болн цаһан мөңгнә медаляр ачлгдла – гиҗ гимназин һардачин үүл дааҗадг Челән Ольга келҗ өгв. – Тер тоод алтн медаляр 4 күн ачлгдв – Усан Анита, Эрднин Илона, Василин Альмина болн Дельгә Александр мөн. Цаһан мөңгн медаль хойр күүнд бәрүлҗ өггдв – Амина Раджабова болн Айнагуль Турумбетова тиим өөдән ачлвр авв, – гиҗ Ольга Павловна онц заав.
Химийин болн биологийин кичәләр ЕГЭ-н шүүвриг 4 күн сәәнәр өгв. Эдниг шүүврт химийин багш Челән Ольга болн биологийин багш Тавуна Александра җилин эргцд немр кичәл өгч белдҗәлә. Тер мет арвтнр эврән репетитормудла сурад, Интернетин кесг эв-арһ олзлад медрлән гүүдүлв.
Тиим кевәр эднә сурһульчнрас Эрднин Илона Академик И.П. Павловин нертә Санкт-Петербургин эмнлһнә шаңһа негдгч ик сурһульд орв. Делгә Александр Аһшин эмнлһнә ик сурһулин оютн болв, Амина Раджабова Сарпулин эмнлһнә ик сурһульд орв, Болдра Дансурен Түмн балһсна эмнлһнә ик сурһулин негдгч курсин оютна тоод орв.
Физикин болн эсвин әңгәр сурчасн арвтнрас 2 күн вузд орв. Эдниг физикин багш Людмила Харайкиева, эсвин багш Һәрән Лариса болн информатикин багш Этери Алхастова белдҗ, медрлинь гүүдүлҗ, күнд даалһвр яһҗ күцәдгинь дигтәһәр цәәлһҗ өгчәлә.
Гуманитарн кичәлмүдин салврт сурһульчнриг тууҗин болн обществознаня кичәләр багшнр Ольга Андреева болн Коозан Александра белдв. Эднә сурһульчнр һоллгчдан экономистин болн юристин эрдм шүүҗ авв, вузмудт тиим мергҗлд марһан ик болна, тегәд эн кичәләр бат гүн медрлән үзүлх кергтә. Тиим кевәр эднә сурһульч Усан Анита экономистин эрдм шүүҗ авад Владимир Роменцин нертә экономикин болн промышленностин бүрдәцсиг заллһна күрәлңд (Москва балһсн) орв. Дәкәд нег эднә төгсәһәч Айнагуль Турумбетова Сарпулин селәнә эдл-ахун ик сурһульд орв, экономикин әәмшг уга бәәдлин мергҗлт эн болхмн.
Тер мет гуманитарн халхар сурч йовсн сурһульчнр Воронеж, Владимир, Санкт-Петербург болн талдан балёсдын ик сурһульмудын оютнрин тоод орснь заах кергтә. Төрскнч седклтә дөрвн арвт Хальмг ик сурһульд орад хамгин чик ишкдл кеснь лавта. Тер тоод Манҗин Динара тууҗин әңгд орв, Лавган Амулң филолог болхмн, Динкин Байр юристин эрдм шүүҗ авв, Бастан Бадм болхла СПО-д юристин эрдм бас дасх.
Эдн цугтан деер келгдсәр шүүҗ авсн кичәләр ЕГЭ-д белдҗәлә, кичәлмүдт болн спецкурст эднд цугинь цәәлһҗәлә. Онлайн тестмүд яһҗ күцәдгинь багшнрин дөңгәр эдн медҗ авчала, давсн җилин даалһвриг күцәҗәлә. Сурһулин җилин эргцд эдн гимназьдан болн района кемҗәнд дамшуллһна шүүврт эсвәр, орс болн англь келәр, физикәр, химийәр, биологийәр, тууҗар, информатикәр, обществознаняр орлцҗ эв-дован болн медрлән гүүдүлв.
Хальмг ик сурһульд болн нань чигн вузмудт орсн Комсомольский селәнә гимназиг төгсәсн көвүд-күүкдт күцәмҗ дурдҗанавидн, сәәнәр сурад таңһчдан туста мергҗлтнр болтн.
ТҮРВӘН Һуна