Селәнә улст тусан күргҗ

Хальмг Таңһчин Толһач Хаска Батун седвәрәр бүрдәгдсн «Эрүл-менд бәәтн!» гидг керг-үүлдврин һурвдгч девсң эн долан хонгт Яшкулин, Хар Һазра болн Баһ Дөрвдә райодт болв. Эмчнр эн райодын селәдин әмтнә эрүл-мендин бәәдл шинҗлҗ, хамгин түрүнд медәтнрт, цергә шишлң керг-үүлдврт орлцачнрт болн теднә өрк-бүлмүдин гешүдт, гемтә-шалтгта улст эдн оньган тусхаҗана. Тер мет эдн зәрм улст гертнь одад, дор ормднь дөңгән күргв.

Давсн долан хонгин чилгчәр эмчнрин баг Городовиковск районд одад, Городовиковск балһсна болн Южный селәнд көдлв. Района эмнлһнә эмчнрт дөң болхар Элстәс П.Жемчуевин нертә таңһчин эмнлһнә эндокринолог болн Яшалтан районас зүркнә эмч ирв. Бәәрн улс олн зүсн хальдврта гем илдкҗ авхин төлә цусан өгв, УЗИ, маммографин болн флюорографин шинҗллт кев. Эн өдр ут тоодан 323 күн эмчнрин хәләврт орад, эрүл-мендин бәәдлиг шинҗлҗ, ямр нег гемиг эртәр илдкҗ авхин болн эмнлһ кехин төлә иим керг-үүлдврмүд эрк биш давулх кергтәг темдглв. «Бидн таңһчин хотл балһснас хол бәәнәвидн, тегәд иим керг-үүлдврин йовудт эрүл-мендин бәәдлән шинҗләд, эмчнрин сүв-селвг ав чадвидн. Нег үлү медәтә улсин төлә эмчнр ирснь сән болв» гиҗ бәәрн улс келв. Эмчнрт бийән үзүлсн улс дундас 8 күн таңһчин эмнлһнд йовулгдв, 28 күүнд немр шинҗллт кех селвг өггдв. Городовиковск района эмнлһнә ах эмч Босхмҗин Виктория П.Жемчуевин нертә таңһчин эмнлһнә болн Яшалтан района эмнлһнә эмчнрт дөң болснд ханлтан өргв.
Яшкулин районд эн керг-үүлдвр бас дигтә-даратаһар болн өөдән кемҗәнд бүрдәгдв. Бәәрн эмчнрт дөң болхар таңһчин эмнлһнә мергҗлтнр Цистән Ольга, Даван Ирина болн эмнлһнә улд одахн секгдсн эндокринологическ төвин һардач Манган Байрта, Хар Һазра района эмнлһнә эмчнр Акугинә Өлзәт ирв. Утта болн Яшкуль селәдт давулгдсн керг-үүлдврт ут тоодан 115 күн орлцв. Эн өдр эмчнр цергә шишлң керг-үүлдврт орлцсн хойр ветераниг хәләв болн эрмдгтә тавн күүнд гертнь одад эмнлһнә туст селвг өгв. Эн өдрин ашар 8 күн таңһчин эмнлһнд йовулгдв, нег күүнд өөдән чинртә медицинск дөң кергтә болҗахнь медгдв, 3 күүнд месллһ кех болн дәкәд нег күүнд медико-социальн шинҗллтд орх селвг өггдв. Эмчнрин хәләврт орсн улс дундас 2 күүнд ямр нег гем түрүн болҗ илдкгдв, тегәд эднд цааранднь немр шинҗллт кеҗ эмнлһ эклхмн.
Хар Һазра района әмтн урднь чигн «Эрүл-менд бәәтн!» гидг керг-үүлдврт шунмһаһар орлцсн билә. Эн өдрмүдт Комсомольский болн Кумской селәдт дарани девсң бүрдәгдҗ эмчнр ирхиг соңсад зәрм улс өрк-бүләрн ирв. Эн керг-үүлдврин йовудт 128 күн эмчд ирҗ, маммографин, флюорогафин шинҗллт кеҗ, цусан өгв, мергҗлтнрин сүв-селвг авв. Эмчнрт орсн улс дундас 10 күн таңһчин эмнлһнд орхмн гиҗ шиидгдв, 26 күүнд немр шинҗллт кех кергтә болв. Района эмнлһнә ах эмч Петән Зула эн керг-үүлдврт селәнәхн сәәнәр орлцсиг темдгләд, җил болһн диспансеризацд орлцх кергтә гив.
Райодар һарч йовдг эмчнриг багд «Сулда» гидг шишлң медицинск дөң күрглһнә төвин олн зүсн гемәс саглуллһна әңгин мергҗлтнр орад, селәнә әмтн дунд чик авг-бәрцин төрәр күүндвр тогтана.
ДООҖАН Наталья
ЗУРГТ: «Эрүл-менд бәәтн!» гидг керг-үүлдвр Городовиковск районд давулгдсн кем