Сурһульчнрт нерәдсн мөргүлмүд

Бурхн Багшин Алтн сүмд сурһульчнрт болн оютнрт нерәдсн мөргүлмүд кегдҗәнә. Ноха сарин чилгчәр сурһулин шин җил эклхин өмн медрл дасч авлһнд харшлт бичә харһтха, сурһулин җил сәәнәр күцәмҗтәһәр давтха гисн мөргүлмүд келһн сән авъяст тохрсмн.
Ноха сарин 24 -д Хальмгин төв хурлын гелңгүд сурһульчнрт болн оютнрт нерәдсн мөргүл кехмн. Манзшрин гегәнд, нань чигн бурхдт нерәдҗ, медрл дасч авлһнд тусан күргтхә гиҗ зальврҗ тер мөргүлмүд болхмн. Сурһулин шин җилин өмн тиим мөргүлд орлцлһн йир туста болна.
Багшнр зааҗадг тоотыг сәәнәр тодлҗ авхин төлә, җилин туршарт цугтан эрүл-менд бәәҗ, темдглҗ авсн тоотан күцәхд эн мөргүл эрк биш туслхмн.
Ноха сарин 31-д бас тиим мөргүл болхмн. Ямаран нег учрар урднь мөргүлд орлцҗ эс чадсн сурһульчнр болн оютнр амрлһна эн өдр мөргүлд орад, седкл төвкнүн сурһулин җилән эклхмн. Мөргүлмүд өрүн йисн часла эклҗәхмн.
Седкл-ухаһан батлҗ авхин төлә бичкдүд болн баһчуд ОМ АРА ПАЦА НАДИ гидг ном умшад, зальврад бәәхлә, сән болхмн.

УШКАНА Сувсн