Хальмг малын мах эд-бод кеҗәнә

Шидр Хальмгин селәнә эдл-ахун министр Гаван Тимур таңһчин Толһачин селвгч Анатолий Козачкола хамдан «Сән махн» ООО-д одад, тенд күцәҗәдг көдлмшлә таньлдв.

Тодлхас, 2023 җилд Юй Ядун болн Чжан Цянь Китдын хойр арһлач энүг бүрдәсн болдг. Тенд өдгә цага шишлң кергсл углҗ тәвгдв. Нег хонгин туршарт 300 бод малын болн 2 миңһн хөөнә мах эд-бод кеҗ һарһдг арһ бәәнә. Тер мет 15 миңһн һурвлҗн метр өдгә цагин киитрүләчнр бас тәвгдсн бәәнә. Ут тоодан җил болһн бүрдәцд 17 миңһн тонн мах эд-бод кеҗ һарһна. Келхәс, көдлмшч шин ормс тенд бас бүрдәгдв.
Бүрдәцд ирлһнә йовудт Гаван Тимур болн Анатолий Козачко кесг цехмудын көдлмшиг хәләҗ үнлв. Эндр тенд хатасн мах кеҗ һарһҗана. Инвестиц орулһна эн төсв күцәлһнә йовудт 2 җува арслң олзлхар зуралҗана.
– Тиим чинртә төсв күцәлһн мана таңһчин төлә темдгтә болҗана, тер юңгад гихлә көдлмшч шин ормс йилһгдхмн болн орн-нутгт эдл-уушин әәмшг уга бәәдл тогталһнд бас туста болхмн, – гиҗ Тимур Сергеевич келв.
Хальмг Таңһчин Толһач Хаска Батун даалһсар, урдк җилмүдин үлгүрәр мана таңһч аграрн-индустриальн регион болхар зүткчәнә. Шаңһа төвин болн орн-нутгин залврин дөңнлтәр күслдән күрх арһ бәәнә. Селәнә эдл-ахун халх мана таңһчин экономик делгрүллһнә нег һол әңгнь болдг. Җил болһн Хальмгт АПК-н халхар кеҗ һарһдг эдл-уушин үнн 30 җува арслң тогтана. Хальмгин Толһачин даалһврар 2030 җил күртл эн үзмҗән 25 процентд икдүлхәр зуралгдҗана.
КАРСАНА Евгения