Хотл балһсн шинрүлгдҗәнә

Сегодня, 13:01 | Общество, Таңһчин зәңгс, Зіњг

Хальмгин хотл балһсн сүл цагт өңгән соляд, цуг тоотнь шинрүлгдәд, хаалһснь ясгдад шинрсн болҗана. Энд-тенд кегдҗәдг көдлмшин ашт олн җилдән нег кевәр бәәсн тоот ясгдҗ, шин бәәдл һарчана. Хотл балһсна өөнд болн бурхн-шаҗна үүлдәчнрин нарт-делкән ик цуглранд белдлһнлә ирлцҗәнә. Шинрүлин көдлмш Сиврин хөөн төрскн һазрурн ирсн әмтн цугтан балһсан босхч авчах цагиг тодлулҗана. «Родина» кинотеатрас һарч йовулгдсн әмтн тер бәәриг шинәс босхч авад, терүнд көдлмшин хөөн цуглрҗ ирәд, дуулад-бииләд муурсан мартҗ байрлдг билә. Өрүнднь босч авад, дәкнәс Элстән шин гермүдәр кеерүлхәр шундг билә. Эднә седкл, иргчин иткл Балакан Алексейин болн Чонкуша Петрин «Элстин вальст» мөңкинд тодлгдсмн.

Ода най һар җил давад, «Родина» төвин гер шинрүлгдҗ ясгдв. Өөрк талвң чигн цагин неквр дахулҗ шинрүлгдв. Әмтн амрхд таалта эн талвң урдк кевәрн өрк-бүләрн ирҗ, соньн керг-үүлдврт орлцх арһ бәәнә. «Элстин вальсин» айст дәкнәс элстихн эргҗ бииләд, амрлһна цаган давулхмн.
Элст өдр ирвәс өңгән соляд йовхинь элстихн үзҗәнә. Ленинә нертә һол уульнцин шинрүлгдсн хаалһар йовхд ямаран таалта. Автобусмуд болн нань чигн көлгнә зогсалмуд диг-дараһар шинрүлгдҗәнә. Балһсна төвд бәәдг тагтс шинрүлгдҗ, тод үзгәр бичгдсн болн нань чигн хальмг улсин өвәрцинь үзүлҗәдг кесг тоотар кеерүлгдснь энд бәәдг әмтнд тааста болсн деерән гиичнрт Хальмгт ирсинь тернь медүлсмн.
«Хотл балһсна хүврлтсиг күн болһн үзҗәнә. Хальмг улс энд бәәхинь үзүлгч тоот өдгә цагин эв-арһар – муралмуд зургдҗ, шин цагин LED-экранмудт үзүлгдҗ, әмтнә оньгиг тусхана, - гиҗ Хальмг Таңһчин Толһач Хаска Бату келнә. - Хальмг сойлла болн авъясмудла таньлдулҗадг тоотыг балһсна кеерүлд оруллһн маднд - эндрк үйнрт билг-эрдмин байн зөөр үлдәсн өвкнртән ханлтан медүллһн болҗана».
Зургин ик кев-янз белгдҗәнә. Һурвн ик зургт Бурхн Багш нарта орчлңла мендлсн цагас авн Гегәрлтин хаалһд ортлан кесн хаалһнь үзүлгдҗәнә. Эн гүн учр-утхта зургиг ах-дү хойр Андрей болн Виктор Куберлиновихн зурҗ белдҗәнә.
Билгтә зурачнр Утнасна Дорҗ болн Хаалһин Максимин зургудын өөр ирсн улс нүднә хуҗран хаңһаҗ седкләрн амрна. Хальмг улсин сойлын, авъясмудын ул дер зургдсн зургуд хальмгудын өвәрц билг-эрдмиг үзүлнә.
Тиигәд балһснд хальмг улсин сойлын болн билг-эрдмин өвәрц тоотнь орман олҗ, Элстин бәәдлиг улм ясрулҗана, нааран ирсн улст дәкәд чигн ирх седкл эннь зүүлһҗәнә.
Бурхн-шаҗна үүлдәчнрин нарт-делкән ик хургт орлцачнр Хальмг госфилармоньд болх концерт хәләх гиҗ зуралгдҗана. Ода энд Хальмгин нер туурулсн көгҗмч Манҗин Аркадин талвңд ясврин көдлмш кегдҗәнә.
Филармоня шаҗна үүлдәчнрин нарт-делкән һурвдгч цуглранд орлцачнр Әрәсән улсин артист Игорь Бутмана болн энүнә джазин оркестрин концерт хәләхмн. Эннь байрин ик хургин сойлын көтлврин кемҗәнд болх концерт оюни үүлдврт джазин көгҗм яһҗ ирлцдгинь үзүлхмн.
Филармоня эргндк талвң шинрүлгдәд, әмтн таастаһар амрхд туста олн тоот энд ода бәәнә. Күн болһн бийдән таастаһар амрч болх булңгуд бүрдәгдв.
Тиигәд балһсна цуг бәәриг цаглань сән чинртәһәр белдлһнә көдлмшиг таңһчин болн муниципальн йосна бүрдәцс хамцу үүлдҗ күцәҗәнә. Кергтә болсн цагт шаңһа йосна бүрдәцс чигн дөңгән күргҗәнә. Балһсна әмтн шинрүллһнә болн цеврллһнә көдлмшт орлцҗана. Долан хонгин пүрвә өдр Элстин бүрдәцин көдләчнр балһсан ясрулна.
Эн җил Элст балһсна өөнин өдр нарт-делкән цуглрана өмн болҗана. Элст балһснд 160 өөнин ончта җилд белдврән өргмҗин бәәдлд кеҗәнә. «Нарт-делкән һурвдгч ик цуглрана болн Элстин 160 җилин өөнин хөөн чигн хотл балһснд тосхгдсн болн шинрүлгдсн тоот әмтнд цааранднь церглҗ, балһсна кец-таалынь ясрулҗ, цугтаһинь байрлулҗ йовхмн. Келн-әмтни өвәрцәрн йилһрдг өдгә цага Элстд ирдг улсин то тасршго», - гиҗ таңһчин залврин Ахлачин негдгч дарук Цернә Эрднь тоолҗана.
ҖИРҺЛИН Кермн

Видео