Эмчнр дәкәд селәдәр йовхмн

Хальмг Таңһчин Толһач Хаска Батун седвәрәр 2024 җилд экләд үүлдсн «Эрүл-менд бәәтн!» гидг керг-үүлдврин дарани девсң төгсв. Бату Сергеевич таңһчин эрүл-менд харлһна министерствд, эмчнрт болн райодын толһачнрт ханлтан өргәд, эн керг-үүлдвриг дигтә-даратаһар бүрдәсиг темдглв. Терүнә йовудт эмчнр райодын хол селәдт күрч, бәәрн улсин эрүл-мендин бәәдл шинҗлв. Шидр Хальмг Таңһчин эрүл-менд харлһна министр Саран Булат олнд зәңгллһнә эв-арһсин көдләчнрлә харһад, керг-үүлдврин ашин тускар келҗ өгв.
- Эн керг-үүлдврт райодын эмнлһсин көдләчнрлә хамдан таңһчин бүрдәцсин өөдән мергҗлттә болн байн дамшлтта эмчнр бас орлцҗ, селәдин әмтнә эрүл-мендин бәәдл шинҗлҗ, эмнлһнә туст сүв-селвгән өгч дөң болв. Эмчнр ут тоодан 2,5 миңһн кү хәләв. Урдк кевәрн флюорограф болн маммограф селәдт күрв. Энд бәәдг 402 күүкн күн маммографь кев, 452 күн флюорографин шинжллтд орв. Селәдин эмнлһсин улд болсн хәләврт УЗИ болн ЭКГ шинҗллтс бас кегдв. Эн җил немр лабораторн шинҗллтст 1 миңһн күн орв. 300 күүнд немр шинҗллт болн эмнлһн керглгдв, тиигәд 45 күн П.Жемчуевин нертә таңһчин эмнлһнд орулгдв. Эн керг-үүлдвр олн зүсн гем илдкҗ, цаглань эмнлһ кехд туста болҗахнь маһд уга. Тиигәд, 126 күүнд түрүн болҗ ямр нег гем илдкгдв, - гиҗ Булат Амангельдыевич келв.
«Эрүл-менд бәәтн!» гидг керг-үүлдврин йовудт хол селәдт бәәдг медәтнрт, гемтә-шалтгта улст, цергә шишлң керг-үүлдврт орлцачнрт болн теднә өрк-бүлин гешүдт онц оньг өггдв. Тиигәд, СВО-д орлцсн 31 күн болн теднә өрк-бүлин 72 гешүн эмчнрт бийән үзүлв. Эмчнр 28 күүнә гертнь одад, эмнлһнә туст сүв-севлг өгч дөң болв. Хол селәдт бәәдг әмтн эн керг-үүлдвр бүрдәгдснд ханлтан өргҗ, эмчнр эднд ирҗ дор ормднь шинҗллт кеҗ, олн зүсн гемәс саглуллһна төрмүдәр селвг өгснь туста болсиг темдглв. Района эмнлһст зәрм мергҗлтнр уга, тегәд теднд бийән үзүлхин төлә Элстүр одх кергтә болна.
- Давсн җиләс авн давулгдҗадг керг-үүлдвриг селәнәхн өөдәнәр үнлв. Бидн ода дарани девсң бүрдәлһнә тускар ухалҗ, мергҗлтнрин багд ямаран эрдмтә эмчнр орхин тускар селвлцҗәнәвидн. «Эрүл-менд бәәтн!» гидг керг-үүлдвр цааранднь чигн давулгдҗ сән авъяст тохрхмн, - гиҗ министр темдглв.
Селән һазрт бәәдг әмтнд сән чинртә дөң күрглһнә тускар келхләрн, Саран Булат Үстин района эмнлһнә бат ясврин болн Приютное селәнд поликлиник тосхлһна тускар бас келв. Үстин района эмнлһн эдлврт орулгдснас авн ясвр кегдәд уга бәәсмн. Ода энд бат ясвр кегдснәс нань өдгә цага шин кергсл углҗ тәвгдхмн. Тиигәд, КТ болн рентген кергслмүд олзлҗ өөдән чинртә шинҗллтс кеҗ болхмн. Дәкәд района эмнлһнд диализ кедг әңг секгдхнь хам-хоша бәәдг райодын болн регионмудын әмтнд сән чинртә дөң күрглһнд туслхмн. Дааврта һардачин келсәр, түрүн дөң күрглһнә халхиг ясруллһна шаңһа көтлвр эн җил төгсчәнә. 2026-2030 җилмүдт шин көтлвр эклхмн, терүнә йовудт райодын эмнлһст бас бат ясвр кехмн болн шин бүрдәцс тосхгдхмн гиҗ зуралгдҗана.

ДООҖАН Наталья