Модд суулһхин төлә

Әрәсәд «Ө-шуһу модд хадһлый» гидг аһу ик чинртә керг-үүлдврин доладгч кем эклв. Хальмг Таңһчин Толһач Хаска Бату эн керг-үүлдвриг онц темдгләд, нег һазра улст модд суулһхин туст дуудвр кев.
- Энтн модд суулһлһна йирин седвәр биш, энтн ө-шуһу модд хадһллһна болн мана орн-нутгин эргндк бәәдл ясруллһна чинртә керг мөн. Хальмг Таңһч модд суулһлһна керг-үүлдврт шунмһа кевәр белдҗәнә. Хулһн сарас авн үкр сар күртл таңһчд 687 гектар аһу һазрт 1,5 сай мод суулһхар зуралгдҗана. Нидн мана таңһч эн керг-үүлдврт орлцад, ик күцәмҗ бәрсн төләдән сән гисн 10 региона тоод орв. Ут тоодан 754,6 гектар аһу һазрт 1 сай 676,8 миңһн олн зүсн модн суулһгдсн билә. Күндтә нег һазра улс, эн керг-үүлдврт орлцтн! Бидн хамдан мана таңһчин болн цуг орн-нутгин йиртмҗин байн зөөриг хадһлҗ байҗулҗ чадхвидн!- гиҗ Бату Сергеевич дуудвртан темдглв.
Мана зәңгч