Авалокитешвара бурхна мандл

Хальмгт Энткгин һазрас гелңгүд ирв. Эдн Бурхн Багшин Алтн сүмд Авалокитешвара бурхна мандл тосххмн.
Хальмгин һол хурлын үрврәр Дрепунг Гоманг хурлас эдн ирв. Гевш лхарамб Тензин Сангпо Ринпоче делегациг толһалҗ ирҗәнә.
Бурхн Багшин Алтн сүмд һаха сарин 16-д Авалокитешвара бурхна мандлын тосхлт йисн часла эклхмн. Зурһан хонгин туршарт мандлын тосхлт күцәгдхмн. Өр-өвч седклин бурхна бәәшңгин тосхлт тиигҗ босхгдхмн болҗана. Хулһн сарин 14-д мандлыг цуцллһна үүлдвр кегдхмн. Эн цагин дотр әмтн нааран өдр болһн ирҗ, зальврҗ чадхмн. Олн һазрас ирх гиичнр чигн әрүн эн керг-үүлдврт орлцҗ, бурхнд мөргх таалта болҗана. Олн өдрин туршарт гелңгүд тосхсн бурхна әрүн бәәшңгиг үзҗ, иргчин тускар ухалҗ, бурхндан йөрәл өргх таал әмтнд тиигҗ учрҗана
Кен чигн күн цаг олҗ, шаҗна эн үүлдврт орлцсн болхла йир сән болхмн. Шишлң ном умшҗ кегдҗәх керг-үүлдврт орлцлһн йир евәлтә йовдл болҗана.
Һаха сарин 16-с авн 20 күртл өдр болһн 18 часла гевш лхарамб Тензин Сангпо Ринпоче лекцс умшхмн. «Гүн номин сурһулин үнтә эркн» гидг төрт тер лекцс нерәдгдҗәнә.
Дрепунг Гоманг хурлас ирсн гелңгүд Көтчнрт, Баһ Дөрвдт, Яшкульд, Цаһан Амнд болн Лаганьд мандлмуд тосхлһна шишлң шаҗна үүлдврмүд күцәхмн. Одсн һазртан ирсн гелңгүд шаҗна йосрхл күцәҗ, мөргүлмүд кеҗәхмн. Бәәрн һазрин әмтн гевш лхарамб Сангпо Ринпочен әдст күртҗ, терүнә номин цәәлһврт орлцҗ чадҗана.
Энткгин һазрас ирсн гелңгүд кезә, альд мандл тосхх, мөргүл кех зура белдгдсн бәәнә.

УШКАНА Сувсн