Зая Пандитын әрүн тоот

Хальмгт төрскн келнә өдр темдглсн цагла ончта йовдл учрв. Тод үзгиг үүдәсн щаҗна үүлдәч болн гегәрүләч Зая Пандитын әрүн тоот Сарпа селәнә хурлд авч иргдв. Энүнә тускар Көтчнрә района муниципальн бүрдәцин һардвр зәңглв.
Кезәнә цагас авн хальмгуд эврә бичгтә бәәсмн. Тод үзг гидг нертәһәр терүгинь шаҗна болн йосн үүлдәч Зая Пандит үүдәсн болдг. Бурхн-шаҗна халхар гүн медрлтә, олн-әмтн дундан ик тоомсрта бәәсн номт сурһульчнртаһан хамдан тер тод үзгт Бурхн Багшин номта үүдәврмүдиг орчулҗ орулсн болдг. Ухани тиим зөөриг Зая Пандит маднд үлдәсмн. Терүгинь ода номтнр болн шаҗна үүлдәчнр дасч, номин үүлдврт орулҗ, олна оньгт тусхаҗана. Төрскн келнд нерәдсн өдрлә болн нань чигн байрин өдрмүдлә алдр номт болн гегәрүләч Зая Пандитын нер амлгдҗ, хальмгуд терүнд күндллһән медүлнә.
Шидр Сарпа селәнә хурлд оюни ик чинртә йовдл болв. Зая Пандит гегәнә әрүн тоот эн хурлд авч иргдв. Ончта эн йовдлд нерәдҗ, энд ик мөргүл кегдв. Шаҗна эн йосрхл күцәлһнд Бурхн Багшин Алтн сүмин гелңгүд орлцв.
Зая Пандитын әрүн тоот Сарпан хурлд хадһлгдхмн. Бурхн –шаҗнд шүтдг улст ирҗ зальврхд евәлтә дәкн нег бәәрн тиигҗ үүдҗәнә.
УШКАНА Сувсн