Диилвр бәрсн сурһмҗлач ачлгдв

Шидр Элст балһсна 20-ч тойгта бичкдүдин садын сурһмҗлач Настан Виктория «Төрскн келнә болн утх зокъялын сән гисн багш» гидг Цугәрәсән марһанд диилвр бәрснә туск байрта зәңг һарв. Хальмг Таңһчин Толһач Хаска Бату Виктория Анатольевнала харһад, энүнд «Хальмг Таңһчин ачта багш» нер зүүлһв.
- Энтн орн-нутгин багшнрин марһанд түрүн болҗ диилвр бәрсн йовдл мөн. Тегәд эн йовдл Хальмгин бахмҗ болҗ, эврәннь кергтән дурта боллһна, бийдән итклһнә болн өдр болһн мергҗлтән өөдлүллһнә үлгүр болҗана. Марһан ах-дүүнр Бурять Республикд болв, терүнә толһач Алексей Цыденовд марһан өөдән кемҗәнд бүрдәгдснд онц ханлтан өргҗәнәв. Мана улсин төлә багш, сурһмҗлач гисн үгмүд әрүн чинр зүүнә. Тер төләд бидн иим улсиг цуг халхар дөңнх зөвтәвидн. Баахн багшнрт болн сурһмҗлачнрт нег дәкҗ өгдг демин мөңгнә кемҗән икдүлгдв, «Җилин багш» марһанд орлцачнрт болн «Келни билг» лауреатнрт мөрә бас немгдв, – гиҗ Бату Сергеевич темдглв.
БАТАН Наталья