Шин эв-арһиг улм өргнәр олзлҗ

Хальмг ик сурһульд багшнр болн оютнр сурһулин шин җилән эклв. Ода СВО-н ветеранмуд «Герои-08» көтлврт орлцҗ, таңһчин ик сурһульд тааста эрдмән экләд дасчана. Талдан балһсна ик сурһулин багшнр Элстүр ирҗ бас ик сурһулин олн төрәр тоолврарн хувалцҗ, шинҗллт гүүдүллһнд урмд өгчәнә.
Эн кергүдт физикин болн эсвин дацңгин оютнр болн багшнр шунмһаһар орлцҗана, түүнә тускар бидн дацңгин һардач Сумьяна Еленала күүндвидн. «Эн җилин абитуриентнриг орулҗ авлһна халхар бидн багшнрла болн оютнрла хамдан баһ биш көдлмш күцәләвидн. Терүнә тускар дацңгин номтнрин хүүвин хургт чинртә күүндвр болв. Тер мет сурһулин йовудыг бүрдәлһнә тускар багшнр тоолвран келв. Дарунь һаха сарин 1-д Медрлин Өдрлә одахн ирсн оютнриг тиңкмин һардачнр, дацңгин шунмһа баһчуд йөрәҗ теднд цәәлһвр өгв. Болв эдн дунд района, селәдин, балһсна сурһульмудын некврәр ирсн оютнр уга, тернь һундлта. Яһад гихлә ода эсвин болн физикин багшнр эс күртҗәхин тускар меднәв, тиим болв чигн эн төрт зөвтә оньг өггдҗәхш», - гиҗ Елена Владимировна тоолвран келв.
Тер мет сурһулин җилин эклцәр талдан вузмудас 2-3-4 әңгүдин оютнр хальмг вузин физикин болн эсвин дацңд ирлцңгү әңгд орхар седҗәнә, болв өнгәр сурхд тиим орм уга, эдниг ода зуг мөңгән өгәд сурһдг әңгд авна. Урднь болхла эдн ЕГЭ-н өөдән балл хоршаһад Москван болн Санкт Петербургин, талдан балһсдын вузмудт орсмн, ода тенд сурхд күнд болҗана, цаг ирвәс улм гүн медрл керглгднә, улм чаңһ неквр тәвгдәд бәәнә, тиим таалд эдн Элстд ирҗ, нам эрдмән соляд чигн сурһулян төгсәхәр седнә.
Урдаснь хальмг һоллгч вуз шүүҗ авсн болхла, тиим дашката юмн һаршго билә, ода болхла эдн мөңгән өгәд сурх зөвтә болҗана. Хөөткән сансн цецн гиҗ кезәнә келсн юмн ода тиигҗ мел чик болҗ һарчана.
Тиигчкәд ода эсвин дацңд ясврин көдлмш кегдҗәнә, тегәд оютнр талдан дацңгудын бәәрнд сурчана. Тер мет һаха сарин эклцәр авъяст тохрсар ноха сарин селвлцән болв. Энд Москван шаңһа вузин багшнр сурһулин шин кев-янзд орлһна тускар келҗ өгв. Тер тоод йосн биш уха (ИИ) өргнәр олзллһна эв-арһ яһҗ теднд дөң болҗахин тускар цәәлһв. Эн керг-үүлдврин дамшлтын кичәлмүдиг Елена Владимировна болн багшнрин дацңгин һардач Очра Ирина һардв.
Хальмг ик сурһулин багшнр сән медрлән эн халхар үзүлв, теднә белдврәр бахмҗ кеҗ болҗана. Хальмг ик сурһулин үүлдврт йосн биш уха олзллһна кесг төсвиг эдн ахр цагин болзгт үүдәҗ, тедниг түргәр бәәдл-җирһлд тохраҗ болхин тускар цәәлһвр өгв. Тер мет Елена Владимировна багшнрин дацңгин негдгч курсин оютнрин төлә тооһин сурһуль-эрдмин туск кесг лекц белдҗәнә.
Терүнәс нань дацңд физикин болн эсвин багшнриг ахр болзгт белднә, тер керг-үүлдвр таңһчин һардврин болн залврин даалһврар күцәгдҗәнә, яһад гихлә таңһчин сурһульмудт эсвин, физикин болн зәңгллһнә багшнр күртҗәхш, эн төриг бачм кевәр күцәх кергтә. Тегәд Хальмг ик сурһульд нег җилә сурһуль бүрдәгдв, эн җил Елена Владимировна дацңгин багшнр-доцентнр С. С. Мучкаевала болн Т. Б. Гольдваргла хамдан багшнриг белдлһнә көтлвр үүдәв.
Тиим кевәр Хальмг ик сурһулин багшнр таңһчин сурһуль-эрдмин амр биш төрмүд хаһллһнд шунмһаһар орлцҗана. Кергтә кичәлмүдин мергҗлтнрин ик баг давсн җилд белдгдлә. Ода тер көдлмш цааранднь кегдх. Болв баһ наста мергҗлтнриг болн багшнриг белдлһнә тускар бас мартхмн биш. Тернь – һоллгч төр. Ода теднд өгдг демин кемҗән таңһчин Толһач Хаска Батун седвәрәр өөдләд, баһ наста багшнрт ик оньг тусхагдҗана. Тер мет теднд селәдт бәәдл-җирһлин сән таал тогтаҗ сурһульмудт бат ясвр цааранднь кеҗ, багшнрин җалвинь өөдлүлҗ үүлдхлә эн төр хаһлгдх гиҗ келҗ болҗана. Өдгә цагт болхла сурһульд көдлҗәдг кадрмудт немр белдвр өгәд эн төр бачм кевәр хаһлгдҗана.
Орн-нутгар авад хәләхлә багшнрин вузмудт ордг баһчудын тонь җил ирвәс өөдләд йовна. Багшин тоомср чигн өөдлҗәнә, теднә күцәҗәдг ик чинртә көдлмш таңһчд болн орн-нутгт ик туста болҗана.

ТҮРВӘН Һуна