Беларусьт болсн харһлтс

Шидр Хальмг Таңһчин Толһач Хаска Бату Беларусьт одад, тенд көлгнә министр Алексей Ляхновичлә харһв.
Евразийск экономическ ниицәнә халхар Беларусин Республик Әрәсән орн-нутгла промышленностин, селәнә эдл-ахун, көлгнә болн талдан халхсар нөкцлтин туст хамцу төсвсән күцәҗәнә.
– Сүл җилмүдт мана таңһчд кесг төсвс: Минск тракторн заводын әңг секлһн, тосхлтын, сурһуль-эрдмин, сойлын, спортын болн зуульчллһна халхар, сән йовудтаһар күцәгдҗәнә. Хамцу үүлдврән улм делгрүләд бәәхвидн. Тер мет Элст-Минск балһсдын хоорнд самолет нислһнә туст күүндвр бас болв. Терүнәс нань «Камволь» бүрдәцин һардврла (зургт) харһад, энүнә әңгиг Хальмгт секхәр бас зуралҗанавидн. Эн бүрдәцд ноос эд-бод кеһәд, олн зүсн эд кеҗ һарһна. Мана таңһч селәнә эдл-ахун регион болна, тегәд җил болһн сән чинртә ноос кирһҗ авнавидн. «Камволь» бүрдәцин әңгиг Хальмгт секәд, көдлмшч шин ормс бүрдәҗ болхмн. Терүнәс нань хувц уйлһна үүлдвриг бас делгрүләд, хам-хоша бәәдг регионмудыг болн СНГ-н ханьд ордг кесг орн-нутгудыг белн эд-таврар теткҗ болхмн, – гиҗ Хаска Бату ашлв.

ОЛЬДАН Цаһан