Селәнә эдл-ахун төрәр күүндв

Одахн Сарпуль балһсна шаңһа аграрн ик сурһулин ул деер номин халхар ик хург болв. Селәнә эдл-ахун мергҗлтнриг белдлһнә болн эн салврин номиг делгрүллһнә шин зөрүллтсин тускар энд тодрха күүндвр бүрдәгдв. Хальмг ик сурһулин һардач Салан Бадм, агрономийин тиңкмин һардачин үүл дааҗадг селәнә эдл-ахун номин доктор Баатрин Владимир, КНИИСХ-н һардач Хахлинә Арслң, КалмГУ-н сурһулин болн методикин заллтын (УМУ) ахлач Ороса Санан эн күүндврт орлцв.
АПК-н халхар мергҗлттә кадрмуд белдх кергтә гиҗ ик хургин йовудт болсн «төгрг ширән» сүүрмүдт келгдв. Тернь эдл-уушар тетклһнә келн-улсин төсвин һол төрнь болҗана. Түүнә ул деер Әрәсәд ик сурһулин шин кев-янзиг тогтаҗ болҗана гиҗ орлцачнр заав. Тер көдлмшиг агроклассмудас авн экләд, баһ наста мергҗлтнрин болн номтнрин чинриг өөдлүлх кергтә гиҗ заагдв.
Аграрн сурһуль-эрдмиг делгрүлхин төлә номиг, сурһулиг болн бизнесиг негдүлхмн гиҗ номтнр тоолҗана. Эн хургт Әрәсән селәнә эдл-ахун министр Оксана Лут, номин болн ик сурһулин министр Валерий Фальков, Сарпулин крайин губернатор Владимир Владимиров үг келв.
– Эндр АПК-н халхар 6, 4 сай күн көдлҗәнә, болв җил болһн 160 миңһн шин мергҗлт кергтә болна, эдн күч-көлснә һарциг өөдлүлҗ, медәтнрин ормд ирҗ көдлх. Бизнесин төлә бас шин эрдмтә улс кергтә: агрокибернетикүд, агробиотехнологуд, һазриг дигтәһәр эд-бод кедг болн нань чигн мергҗлтнриг АПК-д күләҗәнә. Селәнә эдл-ахун күрәлңгүд төгсәҗәдг баһчудын 70 процентнь АПК-д көдлх зөвтә. Номин шинҗллтсин ул деер мана салвр цааранднь делгрх зөвтә, – гиҗ министр Оксана Лут келв.
Тер мет Валерий Фальков АПК-н ик оңдарлтын туск тоолврарн бас хувалцв. Энд номин хамгин шин эв-арһ олзлгдна, тегәд мергҗлтнрт чигн өөдән неквр тәвгдх зөвтә гив. Кесг арвад җилин дамшлтын ул деер ик сурһулин шин кев-янзиг тогтах кергтә гиҗ министр темдглв.
Хальмг делегацин элчнр хоршасн дамшлтарн хувалцҗ, күүндврт орлцв.
– Хальмг ик сурһулин аграрн дацңгин багшнр оютн болһниг сурһлһна онц көтлврт шунлттаһар орлцна, баһчудт немр эрдм дасхлһна кесг арһ өгнә, көдлмшч кесг эрдм эднд дасхна, – гиҗ Хальмг ик сурһулин һардач Салан Бадм онц темдглв. Ик сурһулиг төгсәснә хөөн һарһҗ өгдг хату цаасн баһчудын авсн эрдминь болн немр мергҗлтинь дигтәһәр үзүлнә.
«Сурһуль-эрдмин халхар дамшлт олзлх кергтә. Күч-көлснә рынкин таалд хәрлцәһән өргҗүлҗ, салг-үүлдврин һардачнрин неквринь чигн тоод авч болҗана. Тиим көдлмш Хальмг ик сурһульд өргнәр күцәгдҗәнә»,– гиҗ эн туст селәнә эдл-ахун номин доктор Баатрин Владимир тоолвран медүлв.
Тиим кевәр селәнә эдл-аху ик делгрлт авч, мана орн-нутгин экономикин күчинь батруллһна һоллгч салврнь болҗана. Ирлцңгү төриг ода номтнр болн салврин һардачнр тәвҗәхнь ик чинртә, орн-нутгт болн регионмудт туста керг болҗахнь лавта.

ТҮРВӘН Һуна