Тутрһ экләд хураҗана

Шидр Октябрьск районд тутрһ хуралһна кем эклв. Хальмг Таңһчин селәнә эдл-ахун министр Гаван Тимур Октябрьск района муниципальн бүрдәцин толһач Увшан Басңла (зургт) хамдан эн көдлмшин йовудыг бүрткҗ хәләв.
Темдглхәс, хулһн сарин 6-д кесн то-дигәр, ода деерән 5 миңһн һар тонн тутрһ хурагдсн болв. Әрәсән селәнә эдл-ахун Министерствлә күцәсн күүндврин ашт эн җилд тутрһин тәрәнә һазрин аһу икдв. Тер мет шаңһа дөң күргснә йовудт тутрһин услврт олзлсн усна үннь мана фермермүдт даңцадг болв.
– Тутрһин тәрәнә һазрин аһу икдснь эннь йосна болн селәнә эдл-ахун арһлачнрин хамцу көдлмшин ашнь болҗана. Эн керг таңһчин Толһач Хаска Батун онц бүртклһнд бәәнә, – гиҗ Тимур Сергеевич келв.
Хальмг Таңһчд урһадг тутрһиг нег һазра улс бәәтхә талдан регионмудын әмтн чигн икәр хулдҗ авна, гиҗ темдглхмн. Тәрәнә һазрин аһу икдүлснь орн-нутгт хот-хоолын әәмшг уга бәәдл тогталһнд туслсн деерән тер мет нег һазра фермермүдин олз-оруһинь икдүлх зөвтә.
Тутрһ урһахд зөвәр амр биш гиҗ келх кергтә. Октябрьск районд урһаҗ авдг сән чинртә тутрһиг Әрәсәд талдан регионмудын эдл-ахуст урһаҗ авдг тутрһла әдлцүлҗ болшго. Манад «Боярин», «Рапан», «Фаворит» болн талдан чинртә тутрһ урһаҗ авгдна.
Тодлхд, 2024 җилд Октябрьск районд селәнә эдл-ахун тәрәнә һазр 5,4 миңһн гектар аһу тогтаҗасмн, тер тоод намрин ичмән – 659 гектар, буудя – 1167 гектар, тутрһ болхла 3,5 миңһн гектар аһу һазрт тәргдсн билә. Тутрһ хуралһна кемд җил болһн һучн шаху комбайн, хөрн һар трактор, аца зөөдг кесг машин болн талдан шишлң техник олзлгдна.
Эн җилин тутрһ хуралһна дааврта кем цаарандан давҗана. Тегәд бәәрн тутрһчнр элвг урһц хураҗ авхар зуралҗана.
ОЛЬДАН Цаһан