Чинртә сурһульд орлцв

Хальмг Таңһчин Толһач Хаска Бату нег һазра һардачнрла хамдан Сбербанк бүрдәсн СберУниверситетин шишлң сурһульд орлцв. Терүнд заллтын, өдгә цагин шин эв-арһсла болн эргндк һазр делгрүллһнә халхар шин дамшлтла таньлдх саам учрв.
Терүнә йовудт Әрәсән Залврин Ахлачин дарук Марат Хуснуллин, Москва балһсна мэр Сергей Собянин, «Сбербанк» ПАО-н һардач Герман Греф болн талдан нертә үүлдәчнр дамшлтарн хувалцв.
– Мана таңһчд Сбербанкин туслмҗиг олн-әмтн олзлна. Шишлң сурһулин йовудт хоршаҗ авсн медрлән таңһчин делгрлтин туст эрк биш олзхвидн. Ода деерән ухандм орсн соньн кесг төсв күцәхәр зуралҗанавидн. Хамдан көдлҗ йовдг үүрмүдтәһән дамшлтарн хувалцад, нег һазра улсин төлә сән кец-таал цаарандан тогтахвидн, – гиҗ Бату Сергеевич темдглв.
ОЛЬДАН Цаһан