АПК-н халхар чинртә төсв батлгдв

Сегодня, 13:04 | Общество, Таңһчин зәңгс, Зіњг

Урҗ өдр Хальмг Таңһчин Улсин Хуралын (Парламентин) дарани сүүр болв. Терүнә йовудт арвн дөрвн сурвр хәләгдв.
Керг-үүлдврин эклцәр һаха сард болсн немр суңһврт 11-ч округин нег мандатын суңһачнрин хамгин ик дууһар диилвр бәрсн Бембин Санл Хуралын депутатд батлгдв. «Негдсн Әрәсә» фракцин хазна, алвна, экономикин политикин болн арһлачнрин кергүдин комитетин ханьд эн орв. Депутатын бәрмт шишлң цаас энүнд Улсин Хуралын ахлач Артем Михайлов бәрүлҗ өгв.
Тер мет дәкәд хойр сурвр хәләснә ашт Бадмин Санл Приютна района 2-ч тойгта зарһин әңгин зарһчд батлгдв, Саңһҗин Олег болхла Хальмгин суңһврин комиссин гешүн болв.
Зөв-йос эвдәд, түүрмд тусад, тендәс һарсн улст сүүрт орлцсн таңһчин прокурор Виталий Семенченко социальн, психологическ, юридическ дөң күрглһнә төлә шишлң эв-арһ орулһна тускар келв. Терүнәс нань тиим улст көдлмш олҗ авлһнд нөкд бас болх кергтә гиҗ келгдв. Эн закана төсвиг депутатнр дөңнв. Дөңнсн төсв экләд күцәгдхлә мана таңһчд әәмшг уга бәәдл тогталһнд тусан эрк биш күргхмн, тер мет бүтәгдсн кергүдин то баһрад чигн бәәхмн, гиҗ прокурор темдглв.
Хальмгин залвр шаңһа көдләчнрин теткврин туск региональн заканд орулсн седвәриг бас дөңнсн болдг. «Хальмг Таңһчд селәнә эдл-ахун урһмлын эк һарһлһн» гидг закан депутатнрин олна шиидврәр батлгдв. Селәнә эдл-ахун министр Гаван Тимурин келсәр, эн төсв күцәгдәд, таңһчд АПК-н халх цаарандан улм делгрәд бәәхмн. Эн седвәр агротехникин, йиртмҗин көрңгин халхар шин эв-арһ олзллһнд болн хот-хоолын әәмшг уга бәәдл тогталһнд туслхнь лавта, гиҗ Тимур Сергеевич ашлв.
Таңһчин Улсин Хуралын (Парламентин) Ахлач Артем Михайлов депутатнр болн шаңһа көдләчнр җил болһн диспансеризацд орлцх зөвтә гисн седвәрән орулсмн. Ирлцңгү даалһвр эрүл-менд харлһна министерствд өггдв.
Тодлхд, сүүрин йовудт ут тоодан арвн дөрвн сурвр хәләгдв. Энүнә ашар кесг министерствст болн бүрдәцст ирлцңгү даалһвр өггдсмн.
Хальмг Таңһчин Толһач Хаска Бату Улсин Хуралын сүүрин йовудт АПК-н халхар депутатнр дөңнсн төсвин тускар ухан-тоолврарн хувалцв.
– Депутатнр дөңнсн «Хальмг Таңһчд селәнә эдл-ахун урһмлын эк һарһлһн» закана төсв нег һазра фермермүдт бәәтхә хам-хоша регионмудын селәнә эдл-ахун арһлачнрт туслхнь лавта. Мана таңһчин аһу һазрт сән чинртә эк олзлад, урдк кевәрн элвг урһц хураҗ болхмн. Эн чинртә зака үүдәсн мергҗлтнрт ик ханлтан өргҗәнәв. Тер мет Сарпан услврин сурвлҗнд Әрәсән селәнә эдл-ахун Министерств 100 сай һар арслң йилһгдв. Эн төсв күцәлһнә йовудт Октябрьск болн Баһ Дөрвдә райодт тутрһ болн талдан урһмлын тәрә икдүлҗ болҗана, – гиҗ Бату Сергеевич темдглв.
Тер өдр үдин хөөн Улсин Хуралын (Парламентин) депутатнр Бурхн Багшин Алтн сүмд одад, шидр Энткгәс авч ирсн Алдр Багшин әрүн тоотыг хәләв. Терүнд мөргәд, таңһчиннь болн орн-нутгин цецгәрлтин төлә цуһар дотран зальврсмн.

КАРСАНА Евгения

Видео