Күцәмҗтә көдлмшин ашнь сән болв

Одахн Элстин 17-ч тойгта дунд сурһуль 50 җилин ончта өөнән темдглв. Тер цагин эргцд багшнр соньн тоолҗ болшго кичәлмүд өгв, герлтә ончта йовдлмуд болн мартгдшго кем давв.
Кедү җилин туршарт сурһулиг чадмг багшнр һардҗ йовла. Тер тоод – Бурчугинә Любовь, Бочкан Владимир, Эрднин Раиса орна. Эднә нерд бүрдәцин делгрлтлә болн күцәмҗлә залһлдата.
Тәвн җил хооран 1975 җилин һаха сарин 1-д Элстин хойрдгч болн зурһадгч микрорайона хоорнд хотл балһсна хамгин ик сурһулин һурвн давхр герлтә у-өргн гериг таңһчин туурмҗта генерал, цецн ухата чадмг һардач Басан Бадьминович Городовиков олн-әмтн цуглрсн керг-үүлдврт секлә.
Тиигхд Элст балһсн болн Хальмг Таңһч түргн йовудтаһар өсәд-өргҗәд, бичкдүдин то бас тасрхан угаһар икдәд йовла, сурһульмудын гер күртҗәсн уга. Минь тер хөвтә-кишгтә саамд 17-ч сурһуль тосхгдла.
Сурһулин ончта өөн багшнриг, сурһульчнриг болн теднә эк-эцкнриг хамцулв. Байрин хургт эдниг таңһчин болн Элст балһсна йосна элчнр йөрәв. Энд төгсәһәчр, һардачнр болн багшнр, 11-ч болн 24-ч садмудын сурһмҗлачнр, Хальмг ик сурһулин багшнр, сурһульчнр болн теднә эк-эцкнр цуглрв. Хургт 17-ч тойгта сурһулин һардач Каткан Виктор үг келв. Ода бүрдәцд 87 багш көдлнә, теднә тоод Хальмг Таңһчин 5 ачта багш, улсин гегән-герлин йилһән сән көдләчнр болн Әрәсән сурһуль-эрдмин күндтә 30 көдләчнр йовна, 1490 күүкд сурна. Сурһульчнр балһсна болн таңһчин олимпиадмудт орлцад эврә бүрдәцин нер дуудулҗ йовна. Эдн тиим күцәмҗд яһҗ күрснә тускар сурһулин урдк һардач Эрднин Раиса келҗ өгв.
- Тиим күцәмҗин улыг түрүн һардач Бурчугинә Любовь тәвв гиҗ келхлә буру болшго. 1975 җиләс авн 1992 җил күртл Любовь Борисовна мана сурһулиг һардҗ йовла, тер цагин эргцд багшнрин чадмг күцәмҗтә коллектив хамцулҗ үүдәлә. Би Баһ Дөрвд селәнәс 1985 җилд ирәд хальмг болн орс келнә багшар көдлләв. Тендән, Баһ Дөрвдә һазрт, хәрд һарад, өрк-бүлән авальтаһан өндәлһвидн. Классин һардачар чигн көдлләв. Любовь Борисовна чадмгар көдлдгинь үзләв, кесг селвг түүнәс авлав. Түүнә хөөн 1992-2004 җилмүдт Бочкан Владимир мана бүрдәциг дигтә-даратаһар толһалҗ йовсмн. Дарунь нанд тер дааврта көдлмш күцәх селвг өглә. Тиигәд 24 җилдән һардач болад, түүнә өмн 10 җилдән багшар көдлләв. Мини күүкн бас мана сурһулиг төгсәлә, ода Москван вуз чиләһәд, тендән бәәнә. Мана күцәмҗин ул мана дамшлтта багшнр батрулҗана. Тер тоод эсвин чадмг, медрлтә багшнр Татьяна Дукман, Мария Егорова, Галина Короваева, Татьяна Тимашова билгтә кесг сурһульчнриг өсклә, теднә селвгинь ода баһ наста багшнр өргнәр олзлҗана, – гиҗ Раиса Шургчиевна онц темдглв.
Тернь мел чик, эсвин медрлтә күүкд талдан кичәлмүдиг чигн сәәнәр дасна, кесг кичәлин марһанд орлцҗ чадна.
Багшнр-филологудын ик тәвцинь һардач бас темдглв. Тер тоод Мария Полякова, Мукөвүнә Анна, Людмила Никитина, хальмг келнә кесг дөңцл дегтрин түүрвәч, Әрәсән болн Хальмг Таңһчин ачта багш, Ользән Софья, Хальмг Таңһчин ачта багш Манҗин Евдокия, Кальшан Раиса сурһульчнртан орс болн хальмг келнә бат медрл өгч 17-ч тойгта сурһулин нер дуудулҗ йовла.
Физикин кичәләр сурһульчнран билгтә багшнр Евгений Ксенников болн Көкән Татьяна соньмсулҗ тедниг кесг марһанд белдәд нүүрлгч орм эзлҗәлә. Тер мет химийин багш Тамара Москвичеван сурһульчнр балһсна болн таңһчин марһаст йилһрҗ йовла. Англь келнә багшнр Мария Улюкова, Утнасна Любовь, немш келнә багш Бавҗикә Ольга сурһульчнр англь болн немш келнә олимпиадмудт өөдән ашт күрч мана сурһулин нер харсч йовла.
Биологин багшнр Татьяна Иванова, Галина Рарова бат медрлтә сурһульчнриг өскҗ йовла. Йирдән мана сурһульчнр йиртмҗ шинҗлдг болн түүнлә заһлдата номин кичәләр, тер мет гуманитарн салврар әдл сән медрл үзүлҗ йовла, тегәд чигн эднәс чадмг мергҗлтнр өсч босв, кесгнь олн зүсн эрдм дасад Москвад, талдан балһснд көдлҗәнә. Бидн теднәр болн эндрк сурһульчнрар, мана багшнрар бахмҗ кеҗәнәвидн, – гиҗ Раиса Шургчиевна товчлв.
Түүнә һардврт сурһулин бат ясвр кегдлә, ода сурһульчнр нег селгәнд орна, немр өдгә цагин герлтә у гер эднд бәрҗ өглә. Тегәд сурһульд олн зүсн кичәләр гүн медрл өгхин болн сурһмҗин ик көдлмш күцәхин төлә цуг таал бәәнә. Элстин 17-ч тойгта сурһулин багшнриг болн сурһульчнриг, теднә эк-эцкнриг, төгсәһәчнриг ончта өөнлә йөрәҗәнәвидн, улм сәәнәр сурч орн-нутгтан, таңһчдан, Элст балһсндан улм ик тусан күргҗ йовтн, гиҗ дурдҗанавидн.

ТҮРВӘН Һуна