Номин нилчәр җирһл оңдарна

Хулһн сарин 24-д «Номин шинҗллт мана эргнд» гидг Цугәрәсән гегән-герлин керг-үүлдвр эклв. Номин болн технологин делгрлтин җисәнә арвн җилин өөнд тернь нерәдгдҗәнә. Номин шинҗллтин болн ухалврин салврт орн-нутгин йосн яһҗ делгрҗәхин тускар тодрхаһар үзүлҗәнә. Орн-нутгин цуг регионмуд түүнд орлцҗана, тер мет маднла өөрхн бәәдг орн-нутгудын – Абхазин, Белоруссин, Узбекистана, Таджикистана, Өмн үзгин Осетин олн улс терүгәр бас соньмсчана. Иим ик кемҗәтә керг-үүлдвр ик сурһулин багшин өдрлә – үкр сарин 19-д төгсх. Хамгин түрүнд эн кергин йовудт номин өдгә цагин күцәмҗиг үзүлҗ хоршасн медрләрн номтнр хувалцх.

«Мана орн-нутгин Президент Владимир Путин номин болн технологин арвн җилин керг-үүлдвр зарлла. Түүнә йовудт кеҗәдг шинҗллтин болн шин тоот секч илдклһнә көдлмшт улм икәр баһчудыг орлцуллһнд һол оньг өггдҗәнә. Ода болҗадг керг-үүлдврин йовудт Әрәсән цуг регионмудын болн зәрм һазадын орна әмтн 300 лекц соңсад, номин объектсин көдлмшинь үзҗ, «Приоритет-2030» көтлврт орлцҗадг вузмудт теднә субъектсин толһачнрла харһҗ чадх. Тер мет мана орн-нутгин үүдәһәчнр бәрсн күцәмҗин тускар медҗ авхмн.
Номтнрин көдлмшин тускар тиигҗ өргнәр медүллһн болн номтнрин кесг шин илдклин тускар зәңгллһн ик чинр зүүҗәнә. Технологин салврар нүүрлгч орм эзлх арһ өгчәнә, тернь мана орн-нутгин келн-улсин һоллгч ухан-седвәр болҗана, тиим һол күслиг Президент тәвҗәнә. Эн ик керг-үүлдврт орлцҗадг күн болһн бийдән туста медрл хоршаҗ шин седвәрмүд түүнд урмд өгтхә!» – гиҗ эн ик керг-үүлдвр эклхин өмн өргнд Әрәсән залврин Ахлачин дарук, мана таңһчд кесг дәкҗ ирсн Дмитрий Чернышенко темдглв.
Иим ик кемҗәтә керг-үүлдвриг «Медрл» ниицән күцәҗәнә. Номар соньмсҗадг цуг улсин оньгт Әрәсән «Медрл» ниицәнә видеолекцс тусхагдҗана.
- Мана Хальмг ик сурһуль бас «Приоритет-2030» көтлврт орн-нутгин нүүрлгч вузмудла хамдан орлцҗана, селәнә эдл-ахун, биологийин, генетикин халхар нәрн шинҗллт энд кеҗәнә. Түүнә тускар мана номтнр бас тодрхаһар келҗ өгч чадҗана, теднәс кесгнь «Медрл» ниицәнә ханьд орлцҗ, олн улст, оютнрт лекцс умшҗ шунлтта үүлдвр күцәҗәнә, – гиҗ Хальмг Таңһчин «Медрл» ниицәнә ахлач Манҗин Элеонора маднд келв.
Одахн Элстин 18-ч тойгта дунд сурһульд ЮФО-н классин һардачнрин ик хург болв. Энүнд Әәдрхнә, Ростовин болн нань чигн мүҗсин багшнр орлцҗ дамшлтарн хувалцв. Хальмг багшнрин дамшлт эднд бас икәр таасгдв.
Олн зүсн төрәр лекц умшхар седҗәх номтнрин болн мергҗлтнрин, йирин улсин төлә Әрәсән «Медрл» ниицәнә 25 белн материал орн-нутгин ниицәнә дегтрин саңд бәәнә.
«Ном мана эргнд» гидг кергин йовудт губернатормуд оютнрла болн баһ наста номтнрла харһҗ теднә сурврмудт хәрү өгх. Тиим харһлт шаңһа ик сурһульмудын, регионмудын номин төвмүдин болн «Приоритет-2030» көтлврт орлцҗадг вузмудын талвңгудт болхмн.
Эн керг-үүлдвриг товчлҗ «Медрл.Ном» төрәр лекцс умшгдхмн, тернь Москвад хулһн сарин чилгчәр болсмн. Нүүрлгч номтнрин лекциг 5 миңһн күн соңсч чадх, эн ик кемҗәтә наадмиг цуг орн-нутг телеүзләр эс гиҗ ниигмин сүлҗәнд хәләҗ болхмн. Түүнә бүрдәһәчнрнь Әрәсән «Медрл» ниицән болн Москван политехникин ик сурһуль болх, тер ик керг-үүлдврт ик сурһулин болн номин Әрәсән Министерств ик дөңгән күргх. Келн-улсин Әрәсән төвин талвңд тернь болхмн.
«Ном мана эргнд» гидг керг-үүлдвр болн «Медрл.Ном» гидг наадм Әрәсән Президент Владимир Путин зарлсн номин болн технологин арвн җилин өөнд нерәдгдҗәнә. Номин күчәр ямаран чигн кергиг бүтәҗ болхмн, тегәд түүнә эв-арһиг цааранднь чигн өргҗүләд бәәхлә, мана орн-нутгт, цуг улст ик туста болхнь лавта.

ТҮРВӘН Һуна