Хальмгин «Торһа» Вологда балһснд

Ик Буурла района «Торһа» ансамблиг әмтн сән меднә. Вологда балһснд хальмг артистнр билг-эрдмән үзүлхмн.

Олн җил үүлдҗ йовдг коллектив билг-эрдмәрн нер һарсмн. Цугәрәсән, нарт-делкән, регионмуд хоорндк, таңһчин олн марһанд ансамблин артистнр орлцҗ йовна. Билгтә олн баһчуд эн коллективин дөңгәр билг-эрдмән делгрүлҗ йовна.
Вологда балһснд болх билг-эрдмин нәәрт Ик Буурла артистнр орлцхмн. Тенд «Золотая Вологда» гидг нертәһәр хореографическ коллективсин хәләвр - марһан болхмн.
Орн-нутгин ар үзгт бәәдг хамгин кезәңк балһсдын негнь болгч Вологда Әрәсән кесг регионмудас бииһин эрдмәрн нертә олн коллективсиг цуглулҗана. Нааран ирсн олн артистнр тууҗд орсн балһсна 900 җилин тууҗла таньлдх таал учрҗана. Балһсна ке-сәәхн тоотыг үзәд, урмд авад, артистнр балһсна тәәз деер билг-эрдмән үзүлхмн.
ҖИРҺЛИН Кермн